Nongpoh, Nailar, 14: Namar ka jingkam jubor jong ka tnad MeECL ïaki jaka puta jong ki paidbah nongshong shnong haka thaiñ Sumer, ha Ri-Bhoi, ka Joint Action Committee of Land Owners Shillong Western By-Pass kila dawa syndon naka sorkar jylla ban tuklar mardor halor ka jingleh donbor ka tnad MeECL bad rai ruh ban ïeng pyrshah ïaka jingthmu iuhroit jong ka MeECL ïaki jaka puta jong ki paidbah ha katei ka thaiñ hadien ba ka sorkar kala thmu ban shna surok na katei ka thaiñ.
Naka liang ki trai jaka hapoh ka lama jong ka JAC of Land Owners Shillong Western By Pass, Ri-Bhoi District kiba don ruh palat 80 ngut ki trai jaka kila mih ban ïeng pyrshah hadien ba ka sorkar jylla kala thmu ban shna ïa u surok, Shillong Western By Pass ban ïaid lyngba katto katne tylli ki shnong ha Ri-Bhoi bad kumjuh ruh ki shnong kiba hap ha East Khasi Hills District.
Haba kren sha ki Nongthoh Khubor, u Bah Donkupar Sumer, Chairman ka JAC of Land Owners Shillong Western bypass, u la ong ba ka kynhun ki trai jaka hapoh Ri Bhoi District kaba kynthup ïa ka thain Sumer ki la shim ïa ka rai ba tyngeh ban ïeng pyrshah ïa ka jing kam nongkynti da ka tnad MeECL ba ki jaka kiba ka sorkar jylla kan ktah ha ka jingtei ïa u surok Shillong Western Bypass ka dei kaba hap hapoh jong kane ka tnad treikam sorkar.
U la ïathuh ruh, ba kane ka jing kam jong ka tnad MeECL ka la pyn bitar ïa ki trai jaka kiba don kumba 80 ngut tam eiei kiba la shong la sah hapoh ki shnong ba hap ha ka thaiñ Sumer mynta da ki phew phew snem bad kiba la don ruh ïa ki kot ki sla ba pura kiba la dep ban rejister hapoh ka ophis u DC ne ha ki ophis ki Dorbar Raid bad ki Dorbar Shnong.
“Ngim pyrshah ïa ka jing thmu jong ka Sorkar Jylla ban wanrah ïa u surok na ka bynta ka roi ka par bad ka jingsuk ha ka leit ka wan jong ki paidbah namar ka jingkhim palat u surok ha nongbah Shillong kumba la sakhi ha kine ki snem ba mynta, hynrei ngi pyrshah ïa ka jingkam jong ka tnad MeECL ïa ki jaka jong ngi bad ngin ïakhun tyngeh ban pynshisha halor ka jinglong trai jaka kam pher wat lada ngi hap ban ïakhun da ka aiñ “, la ong u Bah Donkupar Sumer.
Ka kong Tinus Kharsawian kawei naki trai jaka kala pynpaw ka jingsngewbynñiaw bad ka jingbitar haka juh ka por halor ka jingleh ka tnad MeECL kaba la kam jubor ïaki jaka puta jong ki paidbah kiba don ruh ïaki kot ki sla kiba biang. Kala ong ruh ba ngi la shong la sah ha kane ka shnong mynta la bun phew snem khlem don kano kano ka huri hura ha kaba ïadei bad ki jaka puta hynrei kaba sngew lyngngoh pat ka long ba ka tnad MeECL kala mih bluit mynta ban wan kam trai ïaki jaka hadien ba ka sorkar ka thmu ban tei ïa u surok lyngba kitei ki shnong.
Shuh shuh ruh, na ka liang ka JAC of Land Owners Shillong Western bypass Ri-Bhoi District ka la rai ruh ban leit buh da ka jing ujor sha ka Sorkar jylla ha kine ki khyndiat sngi na ka bynta ban dawa ban tuklar ïa kane ka jingkam trai jong ka tnad MeECL ïa ki jaka puta jong ki nongshong shnong ka thaiñ Sumer bad lada kam don kano kano ka jingshimkhia na ki bor ba dei peit, na ka liang ka JAC kam banse ban shim pat da kiwei ki lad ba tyngeh.
