Nongpoh, Nailar 14: U Myntri Rangbah ka jylla u Conrad K Sangma mynta ka sngi u la plie paidbah 2 tylli ki skhim pynroi ban kyntiew ïaki nongrep bad ki kynhun IVCS ba kynthup ïaka Prime Hub bad ka Pineapple Processing Unit haka shnong Umdihar ha Ri-Bhoi District.
Ha katei ka jingplie ïa kitei ki 2 tylli ki skhim pynroi la wan ruh ban sakhi da ka jingdonlang u Dr C Lyngdoh MLA ka Umsning, ka kong Macdalyne S Mawlong MDC ka Umsning, Arpit Upadhyaya Deputy Commissioner ka Ri-Bhoi ki ophisar naka tnad District Project Management Unit (MBDA/MBMA) bad kiwei kiwei ki ophisar bad ki riew rangbah kynthup ruh ki nongïalam ka Umdihar IVCS.
Haba kren ha katei ka sngi naka liang u Myntri Rangbah ka jylla u Conrad K Sangma u la pynpaw ba katei ka Prime Hub bala plie paidbah ha katei ka sngi kam dei tang naka bynta ban kyntiew ïaka ioh ka kot hynrei ban wanrah ruh ki jingkylla bad jingkiew haki liang baroh haba nujor bad ki por bala leit noh, khamtam ki IVCS kiba long kum ki atiar ban ïarap ban kyntiew ïa nongsengkam sengjam khamtam ki longkmie ha kaba katei ka Prime Hub kan treikam kum ka jaka ai jinghikai, ka jaka ban mir jingmut ban ïakynduh lang bad khamtam ban pyni lynti naka bynta ki iew ki hat ban kyntiew ïaka ioh ka kot.
U la ong ruh ba ka shnong Umdihar ka dei kawei naki shnong kaba kham pdeng kaba jan sha ki ïew ki hat, khamtam ka dei ruh kaba don ha surok bah ban suk ka leit ka wan bad kan long ruh kum kawei naki jaka shlem ban kyntiew ïaka ioh ka kot.
Hakajuh ka por u Myntri Rangbah hadien bala plie ruh ïaka Pineapple Processing Unit u la kren shai ba lyngba katei ka jaka pynmih ïaki jait jingshna naduh ki umsoh bad ki jingbam na u Sohtrun kan long ka jingkyrkhu bad ka myntoi kaba khraw ïaki nongrep sohtrun naka thaiñ Ri-Bhoi, bad lyngba ki jinghikai bapher bapher ki nongrep nalor u soh ki lah ruh ban pynmih bunjait ki umsoh, ki jait jingbam na u Sohtrun bad kane hi kan kyntiew ïaka ioh ka kot ki nongrep bad ki liang baroh kumba ka sorkar ka dong ïaka thong ban kynjoh sha ka 10 Billion economy, u la bynrap.
