Jowai, Nailar, 14: Ka Jaiñtia Students Movement (JSM) Wahiajer-Ummulong Area kala pynkup burom ïaki khynnah pule ba pass bha haka Exam jong ka SSLC and HSSLC jong une u snem 2023.
Ha kane ka program la don lang naduh u President ka JSM Central Body samla Leningstar Rymbai uba long kum u kongsan, u President ka Western Region samla Ribok Biam, u Headmaster ka Achiever Secondary School Ummulong Sir. Tripleson Muksor, ki nongïalam ka Central Body kamjuh ki nongïalam Western Region.
Ha kane ka jingïalang la ïoh ïa ki kyntien pdiang burom na u President ka seng JSM Wahiajer-Ummulong Area u samla Heihokmi Supuh bad ki katto katne ki nongïalam jong ka seng.
Na ka liang u President JSM (CB) samla Leningstar Rymbai ula ai ki kyntien sneng kyntien khraw bad ula kyntu ïa baroh ki samla pule ban kin pynlait ïalade na ka jingshahteh shahkhum ha ki bor jong ka Social Media, khnang ba kin lah ban pyndep ïa ki kamram ha ka jingpule kot.
Shuh shuh ula kyntu ba kin long kiba kohnguh ïala ki kmie ki kpa khnang ba ka lawei jing ki kan long kaba phyrnai na ka bynta ka jingim.
La pynkut ïaka prokram da ki kyntien ai khublei bad kitbok kitrwiang ïa ki samla pule da u Secretary JSM Wahiajer-Ummulong Area u samla Rihokbhami Dhar.
