Shillong, Nailar, 14: Ka Khusnam sah kynmaw ïa ka Crystal Gayle Kharnaior la pynlong ha Raj Bhavan ha kaba u Lat ka Jylla u Phagu Chauhan, u la long kum u kongsan ha ryngkat ka jingdonlang jong u Myntri ka Sorkar Jylla u Bah Paul Lyngdoh.
U Lat haba kren ha kane ka sngi u la kynthoh ba dei ban don ka shlem kaba shngaiñ na ka bynta ki barikor ba kin kyrsoi ïa la ki sap tynrai bad ka Sorkar ka dei ban kyrshan ïa ki jingpyrshang jong ka synjuk Riti Academy.
U la ban jur ruh ba ki iktiar Sorkar Kmie ki lah ban theh ki jingïarap lada ka don ka jingtreilang na jylla da baroh ki briew naduh ki kynrem lyndan haduh ki riew paidbah.
Ïa ka khusnam sahkynmaw ïa ka Crystal Gayle Kharnaior 2023 la ainam sha u Bah Ïan Lyngdoh Nongkynrih na ka bynta ka kot kaba la u thoh halor ki jingkieng jri sha Ri-War ki ba u la shem da ki spah tylli bad halor ka durim TV shi sngi Ha La Shnong (A day in the village) ba ju pyni barabor da ka Doordarshan Kendra.
La ñiewkor shikatdei ïa kine ki kam bakhraw jong u Bah Ïan Lyngdoh Nongkynrih bad la bishar ba u donhok ban ïoh ïa kata ka nam ka burom.
Kum shi bynta na ka jingrakhe sam khusnam, la pynbna paidbah ruh da u Bah Raphael Warjri, Khliehduh jong ka Synjuk Riti Academy ban kyntiewnam da ka khusnam sah kynmaw halor ki akhia rangbah ba dang shu khlad dang shen u Waheh S Quotient Sumer Award bad Rangbah Sumar Sing Sawian.
Kum ka dak jong ka burom na ka bynta ka longiing longsem jong kita ki longiing la pynkup burom ïa ka kong Bijoya Sawian na ka liang ka longing longsem ki kur Sawian, na ka bynta ba la kubur ïa ka khusnam halor u Rangabah Sumar Sing Sawian bad ïa ka Kmie ki khun Riwotki Laloo bad u khun rangbah Riquoma Rq Laloo na ka liang ka longiing longsem jong u Waheh S Quotient Sumer ba ki la kubur halor ka khusnam sahkynmaw.
Kum ban shu pynkynmaw, u Waheh S Quotient Sumer, u dei u radbah nongthoh bad u simpah simsong u bakhraw ka jingtip shaphang u Kiang Nangbah bad uba la long teng u dkhot jong ka Sahitya Akademi. Ïa kine ki khusnam sahkynmaw ban kyntiewnam ïa kita ki radbah jong ka thoh ka tar bad ka deiriti, la khmih lynti ban sa sdang naduh ka lyngkhuh snem ba nyngkong jong ki ban ïai pyrto ïa ki synñiang bakhraw ba ki la thehsei ha ka imlang sahlang.
