Ka jingpynslem ïa ka pisa JJM kam don jingïadei bad ka pla tyngka jong ka Sorkar Jylla: CM

Shillong, Risaw 07 : U Myntri Rangbah ka Jylla, u Conrad K. Sangma, u la ong ba ka jingpynslem ban ïoh ïa ka pisa na ka Jal Jeevan Mission (JJM) kam don jingïadei satia bad ka jinglong ka pla tyngka jong ka Sorkar Meghalaya.
Katkum ka kyrwoh khubor, u Myntri Rangbah u la ong ba ka pla tyngka jong ka Jylla ka long kaba skhem, bad ka jingpynslem ha ka jingpyllait ïa ka pisa JJM ka mih na ki jingeh kiba ïadei bad ka jingkut jong ka samoi jong ka JJM.
Katkum ka jingong jong u, ka JJM ka la treikam na ka bynta san snem, hynrei hadien ba ka samoi jong ka Mission ka la kut, ka Ministry of Finance kam shym la lah ban pyllait ïa ka pisa haduh ban da ïoh ka jingmynjur na ka Kynhun Myntri jong ka Sorkar Pdeng ban bteng ïa ka kam.
“Ka JJM ka long ka skhim kaba la bei tyngka da ka Sorkar India bad ki Jylla ha ka rukom 90:10. Namarkata, ka jingbteng jong ka Mission ka donkam ïa ka jingmynjur bad ki jingpynbeit thymmai na ka liang ka Sorkar Pdeng,” u la ong.
U Conrad u la ong ba mynta ka Kynhun Myntri jong ka Sorkar Pdeng ka la mynjur ban bteng ïa ka JJM, bad ka Ministry of Finance ka la buh ruh ïa ki kyndon thymmai kiba dei ban bud da ka Ministry of Jal Shakti bad ki Jylla.
U la ong ba ka Meghalaya ka la pyndep jan baroh ki kyndon ba la buh, bad ka Jylla ka khmih lynti ban ïoh ïa ka jingpyllait pisa kaba nyngkong kaba ïadei bad ka JJM.
U Myntri Rangbah u la ban biang ba ka jingpynslem ïa ka pisa JJM kam dei namar ka jingeh ha ka pla tyngka jong ka Jylla, hynrei ka dei namar ki jingpynbeit kiba ïadei bad ka jingbteng jong ka Mission.