Ban pynkhlaiñ ïa ka jingïakhun pyrshah HIV yn pynbun ka sorkar ïa ki ART Centre bad ki nongtrei

Shillong, Risaw 07 : Ka Sorkar Meghalaya ka dang pynkhreh ban pynbun ki ART Centre bad ban thung shuh shuh ïa ki nongtrei, khnang ban pynsuk ïa kiba donkam jingsumar ïa u khñiang HIV, ong u Myntri ka Koit ka Khiah, u Wailadmiki Shylla.
Haba kren bad ki lad pathai khubor, u Myntri u la ong ba ka sorkar ka la ïoh ka jingmynjur na ka Kynhun Myntri na ka bynta ka plan kaba san snem, bad mynta ka dang pynkhreh ban thung nongtrei thymmai bad ban plies huh ïa ki ART Centre kiba thymmai.
U Myntri u la pyntip ruh ba ka sorkar ka dang pynleit jingmut na ka bynta ki jingpynsngewthuh paidbah halor u khniang HIV. U la ong ba ka prokram pynsngewthuh kaba la pynlong mynshwa ka la sdang ban pynmih bun ki kam bad ki jingïatreilang.
“Ngam pat peit ïa ki jingtip kiba thymmai halor ka HIV mynta, namar ngi dang pynleit jingmut bha sha ka jingpynsngewthuh paidbah,” u la ong.
U la ong ba hadien ba ka Kynhun Myntri ka la mynjur ïa ka plan kaba san snem bad ïa ka mang pisa, ka sorkar mynta ka dang pynkhreh ban pyntreikam ïa ka.
U Myntri u la pyntip ruh ba ka Meghalaya AIDS Control Society (MACS) kan pynlong ïa ka Youth Festival, ban pynshlur ïa ki samla ban wan ïashim bynta ha ka jingïakhun pyrshah ïa u khniang HIV.
“Ka jingpynsngewthuh kaba ngi la sdang mynshwa ka la wanrah bun ki kam. Mynta ruh ngi dang pynkhreh ïa ka Youth Festival da ka MACS, khnang ba kham bun kin wan ïashim bynta bad ïatreilang ban ïakhun pyrshah ïa u khniang HIV,” u la ong.