Shillong, Risaw 7: Ki nonghikai skul kiba don hapoh ka shatri All Meghalaya Primary School Teachers Association (AMPSTA) mynta ka sngi ka 7 tarik u Risaw kila mih paidbah ban ïa khih halor ki phra tylli ki mat jingdawa kaba ïadei bad ki nonghikai ha ki skul Primary jong ka jylla.
Ïa kane ka jingïakhih kila pynlong da ka jingïaid paidbah ba jai jai na khmat ïing dorbar shnong Golflink bad poi sha khyndailad phai biang sha Polo bad poi biang sha iing dorbar shnong Golflink ha kane ka sngi da ki spah ngut ki nonghikai na kylleng kila wan ban ïa shim bynta.
Haba kren ka kong Daribha kadei ka Vice President jong ka AMPSTA kala kren halor ki phra tylli ki mat jingdawa kaba kila thoh ha ka banner, kita ki long ban pynneh ïa ki kam kiba lait ha ki skul sorkar bad ki skul deficit.
Ka sorkar ka dei ban thung noh ïa ki nonghikai ha ki kam kiba la long thylli ha ki skul sorkar bad ki deficit bad ha kito ki skul ba don tang u wei u nonghikai, ka sorkar ka dei ban pyllait ïa ki nonghikai na ka kam thoh kyrteng nongthep vote.
Ka sorkar ka dei ban ithuh noh ïa ki nonghikai kiba la thung kam shuwa u snem 2007 kum ki nonghikai skul sorkar, ka sorkar ka dei ban pynshai paidbah ha kaba ïa dei bad kine ki mat jingdawa ki nonghikai, ha kane ka sngi u General Secretary u bah F.C Shullai u la ai jingkren ha kane ka jingïakhih ki nonghikai.
