Sngewkhia u Myntri ba dang don ki shnong kiba ym pat lah ban pynpoi surok

Shillong, Risaw 07 : U Myntri ka Koit ka Khiah ka jylla, Bah Wailadmiki Shylla, ha ka sngi Balang u la ong ba na baroh ki sorkar jylla kiba la dep baroh dei tang kane ka sorkar ba mynta kaba shimkhia bad pynïoh bad shna bun tam eh ki surok ha kylleng ki bynta jong ka jylla.
Haba kren bad ki lad pathai khubor, u Myntri u la ong pat ba kum ka sorkar ki don ruh ka jingsngewkhia na ka bynta kito ki shnong kiba ym pat poi surok bad ka jingshah ktah ban ïoh ïa ka jingsumar kaba biang.
“Peit, kam dei tang namar ba ngi ap ïa kawei ka jingjia ban jia. Kumba nga la pynpaw mynshwa lada phi peit naduh ba la ïoh jylla, nga mut ba ha kine ki 7-8 snem ba la leit, ngi la dep ban shna bun bha ki surok. Hynrei kumba nga la ong, ngim lah ban leh ïa kiei kiei baroh ha kajuh ka por namar ngi don bun kiwei pat ki bynta ba kongsan kiba ngi hap ban peit lang,” u la bynrap.
Haba pynpaw biang ïa ka jingthmu jong ka Sorkar, u Myntri u la ong, “Ka Sorkar ka khuslai bha bad ngi pyrshang katba lah, khnang ba baroh ki shnong kiba khlem pat poi surok kin ïoh noh da ki surok kiba biang.”
Shuh shuh u la ong ba kam long satia ka kam kaba suk ban leh ha kajuh ka por hynrei la katta ruh ka sorkar kan pyrshang ban pyntikna ba baroh ki shnong kiba ym pat ïoh surok kin sa ïoh noh.