Nongstoiñ, Nailar 14: Ka Hynñiewtrep Youths Council West Khasi Hills District lyngba ka jingïalam jong u Samla Wanteibok Lyngdoh General Secretary, mynta ka sngi ka 14 Nailar 2023 ka la leit ïakynduh ïa u Deputy Commissioner West Khasi Hills District ryngkat ka jingthoh pyrshah ïa ka karkhana M/S M D Ferro Alloys kaba long trai da u Donboklang War na Mawlai Nonglum, ïa kaba kane ka karkhana ka lah ïaid shait shait ban pyntrei ban buh ha Shnong Sohlad Umjaru Rwiang Nongstoiñ Syiemship.
La ong ba la shu pynieng ïa katei ka karkhana thymmai, khlem kano kano ka Public Hearing ba lah mynjur da ki khun shnong ki khun Hima, hashwa ban buh ïa ka karkhana katba kane ka karkhana pat ka lah ïaid beit khlem Public Hearing. Kumta ka Seng ka sngew pyrshah ïa ka jingleh jong ki nong Seng ïa kane ka karkhana, khlem da ïaid ryntih katkum ki kyndon.
Ha ka jingïakynduh ïa u Deputy Commissioner, na ka liang jong u DC Bah Garod LSN Dykes u la ong sha ka Seng ba ïa mynta katei ka karkhana mynta lah pynsangeh shwa, namar kim biang katkum ka jingbthah jong ka State Pollution Board. Hynrei u khlem ong ba lah pynsangeh syndon ne em ïa katei ka karkhana.
Ka Seng ka sngew lyngngoh ba kumno la shu shna ïa ka karkhana khlem ka public hearing. La kumno kumno ha shwa ban buh ïa kino kino ki karkhana lah dei pynlong ïa ka Public Hearing ïa ki khun shnong khun Hima. Hynrei ki nong Seng ïa kane ka karkhana ki khlem ïaid da ka lynti kaba dei. Na ka liang ka Seng ka pyrshah beit ïa katei ka karkhana kaba thmu ban buh ha katei ka shnong khlem ka jingïaid lyngba ka Public Hearing ïa ki paidbah.
