Mairang, Risaw 06: Ka surok na Mawshut sha, Mawkyrdang, Riangmang, Mawsmaikyllang, bad kiwei kiwei kiwei ki shnong ka thaiñ rimen kiba hap ha ka Eastern West Khasi Hills district ki dei ki shnong kiba sei sohbha. Ki nongshong shnong ki im da ka rep ka riang bad ki mar rep ba kongsan ki dei u kba, biskot, ki soh, ki jhur ki jhep bad kiwei kiwei.
Ha ka jingleit peit jong u nongthohkhubor jong u Mawphor ïa katei ka thaiñ ha kine ki khyndiat sngi ba la dep la lap ba ka surok kaba khlad na ka surok bah Mairang-Ranigodown kaba ïaid lyngba ka shnong Mawshut ka poi haduh Mawkyrdang Riangmang katba kawei pat ka surok kaba khlad na kjat u lum Kyllang ka poi haduh Mawsmai kyllang bad Nongum.
Ha katei ka sngi la lap ruh ba katei ka surok naduh Mawshut haduh Riangmang, Mawkyrdang bad kiwei kiwei ki shnong ha katei ka thaiñ ka la sdang ban jot bad ki don ki bynta ba ka rong ba la dep siang ka la pra lut sah satang ki mawria.
Ha katei ka sngi la ïoh ban ïakren bad ki nongshong shnong katei ka thaiñ ha kaba ki la ong ba ki kwah bad ki angnud ba ka sorkar kan phah moramot noh ïa katei ka surok namar lada iehnoh kumto ka jingjot kan nang jur bad kan wan rah ïa ka jingeh ha ka leit ka wan khamtam haba ki nongrep ki kit ïa ki mar rep jong ki ban pynpoi sha ki ïew ki hat. Nalor kata ki la ong ruh ba lyngba katei ka surok ki nongshangkai suwari kiba leit sha lum Kyllang ki bun bha hynrei ha kine ki sngi na ka daw jong ka jingbym biang shuh ka surok ki nongshangkai suwari ki la duna bha.
Shuh shuh ki la ong ba ki nongshong shnong na katei ka thaiñ ki hap ban leit sha Mairang na ka bynta ki kam kiba ïadei bad ki ophis sorkar, nalor kata ki hap ban leit siew leit tda khamtam ha ka sngi ïew Langstieh kumta ka la donkam ban moramot ïa katei ka surok khnang ba ka pynsuk ha ka leit ka wan ka kit ka bah bad kiwei kiwei ki jingdonkam.
