Pyrshah jur ka SPPA Amlarem ba kyntiew kyrdan ïa ka Jaraiñ PHC sah ka Sub-Divisional Hospital

Jowai K’Lyngkot 03: Ka Seng Pynroi Pynbha Amlarem Sub-Divisional Amlarem ha ka jingïalang bala pynlong ha ka 31/12/2022 ha ïing Hall ka Syiem Jingsuk Amlarem ha ryngkat ka jingdon lang ki riew Rangbah Shnong, ki Sengbhalang bad ki riew pawkhmat jong ka Thaiñ War Jaiñtia.
Ha kane ka jingïalang la ïakren shaphang ki kam jong ka seng kiba ïaleh naduh u snem 2018 ter ter tad haduh mynta ban pynïoh ïa ka Sub-Divisional Hospital ha Amlarem kaba dei ka Sub-Divisional Head Quarter.
La ïathuh ruh ba don lai jait ki Hospital (1) PHC (2) CHC bad (3) ka Sub-Divisional Hospital bad ka long ruh kaba heh tam bad kaba lah ruh ban buh tang kawei hapoh ka Sub-Division bad ka dei ruh ban buh hapoh ka Sub-Divisional Head Quarter.
Ka jingpyrshah jong ki ïa ka jingpynkiew kyrdan ïa ka PHC Jaraiñ da ka Sub-Divisional Hospital ka daw ba kongsan eh ka long ba ka Jaraiñ PHC ka don shabar jong ka Head Quarter.
Shuh shuh ka Seng ka la ïohi bad ka shem ruh ba la dei ban buh ïa katei ka Hospital ha Amlarem kaba dei ka Sub-Divisional Head Quarter bad kaba long ka pdeng eh jong kane ka Sub-Division khlem pep ki paitbah kin suk bad kin ïoh jingmyntoi shibun eh bad namar kata ka Seng ka la ïaleh shitom haduh katta katta ban ïoh jaka hangne hapoh ka Head Quarter bad la ïoh ruh ïa ka jaka ban buh ïa kane ka Sub-Divisional Hospital kaba ym duna ïa ka 10 Acre na u Hat Dhar Chairman ka Kur Dhar Sohtken Shmiashyiang Village Amlarem Sub-Division.
Ïa kane ruh la pyntip sha ka Health Department na ka bynta ban leh ïa kaba donkam bad ruh da kaba ai copy sha U Local MLA ma Lahkmen Rymbui ban dawa ban buh Sub-Divisional Hospital hangne ha Head Quarter.
Ka Seng ka la pynpaw ïa ka jingsngewnguh sngewburom kaba khraw ïa ka Health Department namar ba kan ïaid ne leh kat kum ka aiñ synshar khadar ka ri, hynrei kaba sngewsih ka long pat ba naka liang u Local MLA ma Lahkmen Rymbui ula leh da khongpong ïa kane da kaba u pynkiew kyrdan bym shongñia shonghok ïa ka PHC Jaraiñ da ka Sub-Divisional Hospital ha kaba ka Seng ka la ïaleh naduh u snem 2018 ter ter bad haduh mynta ban buh ïa katei ka Sub-Divisional Hospital ha Amlarem kaba dei ka hok jong ka Sub-Divisional Head Quarter kata ym ban pynkiew kyrdan ïa ka PHC Jaraiñ da kane ka Hospital.
Ha katei ka sngi hadien ba la ïakren ba la ïa pyrkhat sani bha bad ba la ïa sngewthuh shai ruh ha kane ka jingïalang ba ka jingpynkiew kyrdan ïa ka PHC Jaraiñ sha ka Sub-Divisional Hospital kaba ka Hospital ka long ka bym shongñia satia.
Kumta ka Jingïalang ka la rai ban dawa na ka Sorkar ban weng noh ïa ka jingpynkiew kyrdan ïa ka PHC Jaraiñ kaba don shabar ka Head Quarter, da katei ka Sub-Divisional Hospital kaba dei ka hok kynti jong ka Amlarem Head Quarter bad ban buh beit ruh ïa ka hapoh ka Sub-Divisional Head Quarter, Amlarem.
Ha kane ka jingïalang ka la rai ruh ba dei ban ïaleh ïakane khlem man thait tad haduh ba ka Sorkar kan buh ïa kane ka Hospital ha Amlarem, namar ka long kaba da shongñia shonghok shisha ban bud ïa ka hapoh ka Sub-Divisional, Head Quarter kata ha Amlarem, la ïathuh u ma Babyson Pakyntein Chairman Seng Pynroi Pynbha Amlarem Sub-Division, Amlarem.