Pynsynsngew u President ka AJMW&LU : Ïa ki jingkular ka sorkar jylla ban siew ka EPF, VDA ïa ki nongtrei muster roll

Khliehriat, Nailur 6: U President jong ka All Jaiñtia Muster Roll Workers and Labour Union, u bah Khroo.L.Pariat ha ka jingïalang ba la pynlong hynnin ka sngi saitjaiñ ha Khliehriat, West Community Hall, East Jaiñtia Hills District, u la pynshai sha baroh ki nongtrei muster roll kiba trei ha ki tnat treikam bapher bapher ha East Jaiñtia Hills District ba ka sorkar ka la mynjur bad kular ban siew ïa ka Employment Provident Fund (EPF) bad yn siew ruh ïa ka Variable Dearness Allowance (VDA), nalor kine mat la ïakren ruh sa kiwei kiwei ki kam ba ïadei bad ki nongtrei muster roll bad la pynithuh ruh ïa ki nongkitkam kiba thymmai jong ka All Jaiñtia Muster Roll Workers and Labour Union East Jaiñtia Hills Unit.
U bah K.L.Pariat u la ong ba ha u snem 2017 ki nongtrei muster roll ki ioh bai trei tang T196 shi sngi bad dei lyngba ki jingiakhih ba jai jai ba la pynlong bad la dawa ruh na ka sorkar ban pyrkhat lem ïa ki nongtrei muster roll bad ka sorkar ka la pynurlong bad naduh u snem 2018 la ïakren halor ka bainong jong ki nongtrei muster roll bad hadien kane la pynkiew sha ka T 555 shi sngi bad watla katta ruh ki dang don ki por ba ki shah khate kum ka bai kali bai stamp.
Ha ka jingialang u bah Pariat u la pynpaw ba mynta ki nongtrei muster roll ki la don ka jingsngew shngaiñ namar kim donkam shuh ban siew ïa ka bai stamp bad ka bai kali lada ki leit sha ki jingïalang ha kaba ka pisa ka poi beit ha ka account jong ki, nalor kata ki khun ki kti kiba leit skul ruh ki ioh ïa ka scholarship na ka sorkar, une u nongïalam jong ki muster roll na Jaiñtia u la kyntu bad ai mynsiem ïa ki nongtrei ba ki dei ban trei bha ïa ka kam ba ki trei bad ki dei ruh ban da pyndep hok ïala ka kamram,
U la iathuh ba kane ka Employment Provident Fund (EPF) ka dei ka aiñ kaba la don lypa bad ïa kane kum ki nongïalam ki la ïakren bad ka sorkar naduh u snem 2018 bad ki la ioh jingthoh na ka sorkar ha u snem 2024 bad dei ha une u bnai jymmang 2026 ki la ioh ban iakren bad u myntri rangbah ka jylla, u Conrad Sangma kumjuh ruh bad u Sumbud myntri rangbah, u bah Prestone Tyngsong bad kumta ki nnongtrei ki la ioh ïa kane ka EPF ha kaba kane ka dei ka pisa ba ot katto katne ka ka bainong ba ki ioh bad kane ka wanrah ïa ka jinsngewshngaiñ ïa ka lawei jong ki nongtrei ha kaba ki lah ban shim ïa kane ka pisa ha kano kano ka por ba ki sngew donkam kyrkieh, shuh shuh ki nongtrei muster roll kin ioh ruh ïa ka pisa kum kaba burom ïa ki ynda ki la shongthait na ka kam kaba tip kum ka Variable Dearness Allowance (VDA) bad kin ioh ruh ïa ka pension.
Kum u nongialam uba peit ia ka jingbit jingbiang ki nongtrei bylla sngi ha ri lum Jaiñtia, u bah Khroo.L.Pariat u la ong ba mynta u dang pyrsnag ban wadlad ban iakren sa bad kito ki nongtrei kiba trei ha ki karkhana dewbilat bad ha ki karkhana coke ba ki nongtrei ki dei ban ioh ia la ka hok namar ka ain ka don kaba tip kum ka Industrial Labour Code.
Shuh shuh u la iathuh na naduh ka 1 tarik u bnai risaw 2026 yn pynkiew biang ia ka bainong sngi, namar ba ki mar bam ki la kiew dor, u khmihlynti ba u Labour Commissioner un sa shong jingïalang noh shen ban peit ia kane ka kam bad khmihlynti ba ha une u bnai risaw ka sorkar kan ai ïa ka notification ban pynkiew bainong biang ïa ki nongtrei muster roll.
Ha kane ka jingïalang la pynithuh ruh ïa ki nongkitkam kiba thymmai jong ka All Jaiñtia Muster Roll Workers and Labour Union East Jaiñtia Hills Unit ki ban trei na ka bynta ka samoi treikam kaba naduh mynta u snem 2026 haduh 2028 ba kynthup u President u bah Nibor Sympli, Vice President, bah Proster Syrti, General Secretary, kong Wanphaibiang Phawa, Assistant Secretary, bah Bartenless Siangshai, Treasurer, kong Treilang Dkhar Treasurer lem bad shiphew ngut ki dkhot Executive.