Ka jingioh ïa ka kyrdan Civil Sub Division ha Patharkhmah, ka long ka jingkyrkhu ïa ki paidbah: S Sohtun

Shillong, Nailur 6: Ka shnong Patharkhmah kaba don ha Ri Bhoi, shen kan sa ioh noh ïa la ka jong ka Mini Secretariat hadien ba ka sorkar jylla kala kyntiew kyrdan sha ka Civil Sub Division bad kane kan wanrah ka jingïadei kaba jan bha hapdeng ki paidbah bad ka bor synshar jong ka sorkar.
U Myntri sorkar ba peit ia ka tnad C&RD Block u Bah Sohthenes Sohtun uba dei ruh u MLA bad MDC ka thain u la leit ban jurip ha ka 5 tarik u Nailur ia ka jaka ban tei ïa ka Mini Secetariat ha ka shnong Patharkhmah kaba hap ruh hapoh ka Patharkhmah Civil Sub Division.
Ha kane ka sngi ba u Myntri Sorkar u leit ban jurip la synran lang ïa u da ki Sordar Shnong bapher bapher jong ka thain ha ryngkat bad u Contractor u ban pyntrei ïa ka kam u Bah Kit Warbah.
Na ka liang u Bah Sohtun u la pyntip ba ka mang tyngka ka dei T. 17 klur kaba la mang tang na ka bynta ka Mini Secretariat lait noh ïa ka Circuit House bad kiwei kiwei de ki jingtei.
“Ynda la dep ïa ka Mini Secretariat baroh ki tnad bapher bapher jong ka sorkar kin don hapoh jong kane ka Mini Secretariat bad kan long ka jingkyrkhu ïa ki paidbah namar ba kim donkam shuh ban leit shaduh Shillong ne Nongpoh ban pyndep ïa ki kam” ong u Bah Sohtun.
Shuh shuh u Bah Sohtun u la ong, “Ym tang katta, hynrei kan plie ruh ïa ka lad ka lynti na ka bynta ki khun samla jong ka dong ka thain ha ka lad ioh kam ioh jam bad kan ïarap shibun eh ïa ki long ïing”.
Halor ka jingkyntiew kyrdan sha ka Civil Sub Division ïa ka Patharkhmah, u Bah Sohtun u la ai khublei ïa ka sorkar bad khamtam eh ïa u Myntri Rangbah u Conrad K Sangma uba la shim khia ban pynurlong ha kaba ïadei bad CSD halor ka jingdonkam ki paidbah ka thain Ri Bhoi hi baroh kawei.
Ha kane ka sngi jong kajingwan ka jong ngi ka long ban peit bad jngoh ha kane ka jaka namar ba shen kin sa shna noh Mini Secretariat ka ban long ka Model Civil Sub Division bad dei na ka katta ka daw ba ngi wan ban peit ïa kane ka jaka ba kumno ki company ne contractor kin ioh ban pyniaid sha khmat ïa ka kam la ong u Bah Sohtun.
Shuh shuh u la ong, “shen yn sa sdang noh namar baroh la dep ban pynbit pynbiang ïa baroh ki jingdonkam kum ka jingkhot tender ruh lah dep lut, kumta ngi wan hangne khnang ba kin dup tip ïa ka jaka khnang ba kin ioh sdang noh ïa ka kam”.