270 klur tyngka mang ka sorkar na ka bynta ka surok Balat-Ranikor-Umpung-Weiloi : Sniawbha

Shillong, Nailur 6 : U National Vice President ka NPP bad Symbud Myntri Rangbah Bah Sniawbhalang Dhar ha ka Sngi Saitjain, ula pan ïa ka jingkyrshan na ka bynta u Dr DRL Nonglait, kyrtong ka NPP ban ïakhun ïa ka elekshon shiteng samoi ka Shillong Lok Sabha bad ong ba u MP na kajuh ka kynhun kaba don ha ka Sorkar Jylla bad Sorkar Pdeng ka dei kaba donkam palat khnang ban lah buddien ïa ki kam pynroi ha Delhi.
U Bah Sniawbha ula pynbna ruh ïa ki project shna surok kiba heh na ka bynta ka thaiñ South West Khasi Hills.Haba ïalap elekshon ha Maweit kaba hap hapoh ka Mawshynrut Constituency, u bah Sniawbha ula pynbna ba ka Sorkar kala dep ban mang 270 klur tyngka na ka bynta ka surok Balat-Ranikor-Umpung-Weiloi.
“Ka surok na Balat, Ranikor, Umpung haduh Weilei ka dei kaba la sniew bha. Ngi la dep ban mang 270 klur tyngka ïa ka bad yn shna ïa ka kumba long ka surok Nongstoin” ula ong haba bynrap ba kane ka jingmang pisa ka pynshisha ba ka Sorkar NPP kam ju ibeiñ pyrshah ïa ki constituency kiba mihkhmat da kiwei pat ki sengsaiñ pyrthei.
U Bah Sniawbha ula pynïasnoh ïa ka jingtheh ïa ki kam pynroi sha ka jingdonkam ban don ïa u MP ka NPP ha Parliament. Ula ong ba ka Sorkar Jylla ka long kaba skhem bha da ka jingdon haduh 38 ngut ki MLA tad haduh u 2028 bad da ka Sorkar NDA ha Delhi, ka jingjop u Dr Nonglait kan pynthikna ïa ka jingïatreilang kaba jan hapdeng ka Shillong bad Delhi.
“Kane ka Sorkar ka dei kaba la skhem lypa bad kan bteng haduh u 2028. Ha Delhi, ka don ka Sorkar NDA. Lada phi jied ïa u Dr Nonglait, un leit bad pyndep ïa ki kam ba sahteng jong ka Jylla. Lada dei hi kajuh ka Sorkar, ngi lah ban wanrah kham bun ki kam pynroi” ula ong.
Haba niew ïa u Dr Nonglait kum u nongïalam uba don kyrdan bad ba shemphang bha, u Bah Sniawbha ula ong “Ka party ka donkam ïa u briew kum ma u. Kum u nongïalam, ula ai shibun ki jingai jingmut kiba kynsai sha ka Sorkar”.
Ula kyntu ïa ki nongthep vote ban kyrshan ïa ka shap ka NPP kaba dei ka kot. “Sngewbha wat nym ieh ïa ka NPP. Ai ba ngin jop mynta ka kynti khnang ba ki kam na Delhi sha Shillong kin ïaid beit ïaid ryntih” ula ong.
U Bah Sniawbha ula pyntip ruh ba ka surok Nongstoin-Maweit ka dei kaba la shimkhia bha hadien ba ka NPP kala thaw ïa ka Sorkar bad kala mang haduh 170 klur tyngka ha ki arbynta.
“Phi donbok palat ba phi don ïa u Bah Gigur. Hadien ba ngi thaw Sorkar, nga la kyntu bha ïa ka surok Nongstoin-Maweit. Ngi la ïoh nyngkong 130 klur tyngka na ka bynta 22 Km bad hadien sa 60 klur tyngka la dep ban mang bad ka kam kala ïaid shakhmat” ula ong.
Haba pynpaw ia ka jingsngewskhem, u Bah Sniawbha u ong ba u Dr Nonglait un tam bun bah ha ri-lum Jaintia, West Khasi Hills bad East Khasi Hills.