Nongstoiñ, Nailur 06: Ka West Khasi Hills kan kynjoh 50 snem ha u bnai Risaw 2026, hynrei kiba bun ki shnong nongkyndong ha West Khasi Hills khamtam ha Ri Lyngngam haduh kine ki sngi, ki dang pyndonkam ban kit jingkit da ki kulai na ki steshon kali ban pynpoi shaduh sha ki shnong ki thaw jong ki. Ka daw ka dei namar ka jingbym pat don ïa ki surok kali kiba biang kiba lah ban poi sha ki shnong ki jong ki.
U nongthoh khubor haba poi sha ki jaka jong ka thaiñ Ri Lyngngam, la lap ba ki dang don bun tylli ki shnong ha katei ka thaiñ ki bym pat don surok bad ïa ki marbam mar dih kum u khaw, shini, mluh bad kiwei kiwei la pynpoi sha ki shnong da kaba kit da ki kulai. Nalorkata la lap ruh ba ki don ki shnong kiba la don ki surok, hynrei tang shu wan u slap ki kali kim lah shuh ban ïaid, namar ka jingsniew ba palat liam.
Haba ïakren bad ki katto katne ki nongshong shnong ha Umdang, ki la ïathuh ba teng teng ki don ki jaka kiba ki kali ki shu ïaid jubor. Kumta wei ba la khreh lei jingleit ki kali ki hap ban khreh lypa la ki nar lyngka, mohkhiew ban khyllie maw bad tih khyndew, na ka bynta ban pyndap ïa ki thliew ki syar, tang ban pynpoi sha ki jaka ba ki mut ban leit buh bad pynpoi ïa ki mar bam mar dih bad kiwei kiwei. Kiba bun ki paidbah nongshong shnong ki la ong ba na ka liang jong ki, ki la leit ud leit nam man ka por sha ki Nongmihkhmat, ba kin kyntu ïa ka sorkar ba kan ïarap lem ban pynbha ïa ki surok, khnang ba ki paidbah kin ym jynjar sah, hynrei ka jubab jong ki nongmihkhmat ka long ba ka sorkar kam don pisa.
Ki paidbah nongkyndong ki la pynpaw ba imat kata ka sorkar ka kham duk ban ïa ki paidbah nongkyndong ka thaiñ Ri Lyngngam. Hynrei, ki la dawa ruh ba ka sorkar ka dei ban pynshai balei ba kam don pisa.Lada dei ba ka sorkar na Delhi kam ai pisa shuh ruh, ka dei ban pynshai lada dei ba ka ai khyndiat eh ruh ka sorkar ka dei ban pan na ka bynta ban pynbiang ïa ki jingdonkam jong ki paidbah.
