Nongstoiñ, Risaw 21: Ka 21 tarik u Risaw man la ka snem ka seng KSU ka ju kynmaw burom ïa ka sngi jong ka jingkhlad noh jong Paiem Wickliff Syiem u ba dei u Syiem khynnah jong ka Hima Nongstoiñ.
Mynta u snem ruh na ka liang ka KSU West Khasi Hills District Unit, ka la ïoh ban leit buh syntiew ha u mot dur jong u Paiem Wickliff u ba don ha ka shnong Porsohsat, Nongstoiñ, West Khasi Hills, kaba dei ruh ka lyngkhuh kaba 38 tylli ki snem jong ka jingkhlad noh jong u.
Ha katei ka lympung jingïalang la don ryngkat ban sakhi da ki dkhot jong ka KSU kiba hap hapoh ka jingpeit jingkhmih jong ka KSU West Khasi Hills District Unit, nangta la wan ban sakhi da ki nongïalam jong ka CEC kiba kynthup ïa u Samla Pynshaiborlang Rani Assistant General Secretary KSU CEC, Samla Spaindarsing Lyngkhoi Assistant Finance KSU CEC bad kiwei pat ki nongïalam.
Ha katei ka jingleit buh syntiew la pynlong ïa ka jingsngap jar kaba shi minit na ka bynta ki kam bakhraw jong u Paiem Wickliff Syiem.
Nalor nangta, ka seng kam lah ban klet ïa ki nongïalam ba hakhmat duh jong ka seng kiba don mynta ha Along kiba kynthup ïa u Samla Raymond Kharjana President KSU CEC, Samla Pynkmenlang Sanmiet Vice president KSU CEC, Samla Rueben Najiar General Secretary KSU CEC.
Haba ai jingkren na ka lïang jong u Samla Pynshaiborlang Rani u la ong, “Kum ki dkhot jong ka KSU ngin ym shah thied lane pyndem hano re hano. Ngin ïaid ha ka hok bad ngin ym tieng namar ka hok barabor ka wanrah ïa ka jingjop” bad bynrap, “Ki bor sorkar kiba long ki ingkhong shyllangmat ki lah ban beiñ ban kynthoh ïa u Paiem Wickliff, ki lah ban ong u dei zero, hynrei ka KSU ka ong ba u Paiem Wickliff Syiem u dei u Hero”.
