Nongpoh, Jymmang 25: Katba dang mih ki sngi bad ki por na ka bynta ban pynurlong ïa ki mad trekam ka seng ban shakri bad ban ïada ïa la ka jaid bynriew, ka HYC Ri Bhoi District ka la dang pynkhlain shuh shuh ban pynïar ïa ki tnad treikam bad na kitei ki tnad treikam ka seng ka la pynsngewthuh ruh ïa ki mat treikam ka seng sha ki samla kiba wan ban pynïasoh sha ka seng HYC hapoh ka jylla.
Dang ha ka 23 tarik u Jymmang 2022 da ki phew ngut ki khun samla na ka dong bad ka thain Sohnidan ha Ri Bhoi ki la wan ban pynïasoh sha ka seng HYC halor ka nongrim ban ai ka jingshakri na ka bynta ki paidbah katei ka thain, ha Ri Bhoi bad ha ka jylla hi baroh kawei.
Na ka liang u President ka HYC Ri Bhoi, u Samla Jason Lennox Nongrum kum u nongïalam ka seng ha Ri Bhoi u la leit ban pynsmai bad ban pynskhem ïa ki nongïalam ba pura ka Sohnidan Circle, kaba dei hadien ba ki khun samla na kitei ki thain ki la shi ïa ka rai ban don ha ka lama jong ka HYC ban ieng bad ban shakri na ka bynta ki daw bah jong ka jaid bynriew.
La sakhi lang ruh ha katei ka sngi ba la pynskhem ïa ki nongïalam ka HYC Sohnidan Circle da ka jingdon lang u Samla Mission Tron, u Samla Lasaros Ranee bad kiwei kiwei ki dkhot bad nongïalam na ka District.
Haba kren ha katei ka sngi, u samla Jason Lennox Nongrum kum u President ka HYC Ri Bhoi, u la pynpaw ka jingkmen ba kat dang mih ki sngi bad ki por kiba bun ki khun samla ka District ki la mih shakhmat ban tynrong ïa ki mat ba kongsan ka jaid bynriew ha ka kyrteng ka seng.
U la pynshai ruh sha ki nongïalam ka Sohnidan Circle na duh ki mad treikam ka seng ba ka pyrshah ïa ka Railway, ki kam khappud bad kumjuh ruh ka jingdawa ïa ka Inner Line Permit (ILP) ba ka seng haduh mynta ka dang ieng skhem ha la ka nongrim bad ka daw hi ka long b akum ka seng ka buh ïa ka jaid bynriew hakhmat ba kum ki khun samla ki dei ban don ka jingkitkhlieh ïa ka eh ka shon jong ka jaid bynriew.
Shuh shuh, u la bynrap ruh da kaba ong ba ka seng HYC kan nym kynran dien ba kan tur shaphrang bad ka khmih lynti ruh ba bun ki khun samla ki wan ban pynïasoh sha ka seng bad lyngba ka shatri lane ka lam jong ka seng HYC kin mih shakhmat ban shakri na ka bynta ki paradoh ki parasnam hapoh ka jylla bad ha kajuh ka por u la kyntu ruh ïa ki dkhot bad ki nongïalam ba ki dei ban don kata ka mynsiem ieid jaid bynriew bad buh shadien ïa kiwei kiwei ki jingeh ba ki ïa kynduh ha ka jingim jongki, u la bynrap.
