Mawkyrwat, Jymmang 25: Ka Khasi Students’ Union (KSU) jong ka South West Khasi Hills District ka pynpaw ka jingsngewkhia halor ka jingpynjulor jong ki bor jong ka mariang ïa ki jingthung jong ki nongrep ba la dep ban sakhi ha kine ki bnai kiba la dep ïa ka jingshah pynjulor jong u phan ha ki kynja khñiang bad mynta pat la sakhi ïa ka jingbam khñiang jong ki ‘riewhadem.
Namarkata, ka seng hapoh ka jingïalam jong u Environmental Secretary ka KSU South West Khasi Hills District, u Plosborlin Kharkahrin da ka jingsngewkhia ki la leit ban ïa kynduh markhmat ïa ka District Agriculture Officer bad ka District Horticulture Officer jong ka South West Khasi Hills District ban ïa kren halor kane ka bynta bad ban wad ki lad ki lynti kumno ban leh nangne shakhmat.
Ka seng ha kane ka jingleit ban ïa kynduh ka la buh ruh ka jingkyrpad kum ka ophis ka dei ban shim khia lem bad ban leh ïa kaba donkam da kaba thaw ki lad ki lynti kumno ban pynduh jait ïa kine ki khñiang kiba wan ban pynjot ïa ki mar rep.
Ka seng ka la buh ruh ka jingkyrpad na ka bynta ki nongrep ba haba don kino kino ki jingshahktah ha ki bor jong ka mariang ne shah pynjulor ha ki kynja khñiang kin sngewbha ban ai jingtip mar mar sha ki bor ba dei peit da kaba ai ka jingïatreilang bad ki, khnang ba na liang ka ophis kin ïoh leh ïa kaba donkam.
La ïathuh ruh na ka liang ki ar tylli ki department ha ka jingleit ban ïa kynduh jong ka seng, ki ophisar ki la kular ban shimkhia halor kane ka bynta. Ha kane ka sngi la synrang lang da ki katto katne ki dkhot jong ka KSU South West Khasi Hills District.
