Mawkyrwat, Jymmang, 25: Ka ophis jong ka District Disaster Management Authority (DDMA), South West Khasi Hills District Mawkyrwat mynta ka sngi ka la pynlong ïa ka jingïalang bad ki ophisar jong ki tnat bapher bapher jong ka distrik ha kaba ïa dei bad ki lad jingïada bad ki jingpynkhreh na ka bynta ka aïom slap bad ïa ka jingialang la pynlong ha Multipurpose Hall DCs, Mawkyrwat.
Haba kren ha kane ka jingïalang ka kong C. Kharkongngor, IAS, Deputy Commissioner jong ka South West Khasi Hills District ka la ong ba la pynlong ïa kane da ka jingthmu ban peit bad bishar bniah ïa ki lad jingïada bad ki jingpynkhreh jong ki tnat sorkar bapher bapher kiba don ha ka distrik ha kaba ïa dei bad kane ka aïom slap jong une u snem khnang ban lah ban tehlakam lada wan lynshop ki bor jong ka mariang.
Haba bud-dien ïa ki kamram bad ka jingkitkhlieh jong kawei pa kawei ka tnat sorkar ka la pynkynmaw ïa ki ban shimkhia bad ban ym kheiñsting ïa ka kam bad ban long kiba kloi bad kiba pynkhreh lada wan kino kino ki jingjia ne jingpynjot jong ka mariang bad ban peit thuh khamtam ha kito ki jaka kiba shah pynjulor barobor kum ka jingtwa khyndew, ka jingpluh ding, ka jingshah bot bording, ka jingshlei-um bad kiwei kiwei bad ban ïaleh ban ai jingïarap kloi lan katba lah khnang ban ïada ïa ki mynsiem briew ïa ki jingdon jingem bad ban pynduna ïa ki jingjulor. Ha kajuh ka por ka la kyntu ïa ki ban wad shuh shuh ki lad ki lynti bad ban ai jingtip na ka por sha ka por.
U bah W. Biam, Additional Deputy Commissioner ka South West Khasi Hills District u la pyntip ba la don haduh kumba 468 tylli ki First Information Report (FIR) kiba la ai jingujor ha ki Police Station ha kine ki ar bnai ba la lah kata na ka bynta u bnai Ïaïong bad Jymmang.
U bah S.C. Laloo, Additional Deputy Commissioner ka South West Khasi Hills District u la tip ba lada don kano kano ka jingpynjulor ka mariang ha kaba ïadei bad ki ïing ki sem, ki jingthung jingtep, ki jingtei, ka jingïap jong ki mrad, ka jingmynsaw ne jingïap briew dei ban ujor da ka ehjahar ne FIR ha ki Police Station kiba don hajan tam jong ki.
Ha kane ka sngi, u bah E. Lynshiang, District Disaster Management Officer, South West Khasi Hills District u la ai ïa ki kyntien khublei.
