Nongstoiñ, Nailar 25: Ki rangbah shnong bad ki paitbah ba shong ha khappud kiba hap ha ka Langpih sector ba kynthup ïa u bah Brilion R.Marak, sordar shnong Kampahduli bah Doiah Sangma sordar shnong Bangjeng, Bah Everet Sangma sordar shnong Nowapara, Bah Jebulon sordar shnong Dronpara, ryngkat ki sordar jong kiwei kiwei pat ki shnong ba la ïadonlang da u bah Phlowing Syiem Nongbah Syiem ka Hima Nongmynsaw, ki nongïalam ka Synjuk Ranbah Shnong Hima Nongmynsaw ki pynshai, ba ki paitbah jong kitei ki shnong naduh Kamphaduli, Bangjeng, Nowapar, Dronpara, Talimara, Umdiangkop, Umdiengphiang, Rajapara bad kiwei kiwei, ki pynpaw ba katkum ka khubor ba la mih ba dei ki ba kwah ban leit sha Assam ka long ka bym shisha bad kaba bakla haduh katta katta.
Ki la ong ba ki paitbah jong kitei ki shnong baroh ki kwah ban don beit ha Meghalaya bad kim treh da lei lei ban leit sha Assam. Kitei ki sordar ryngkat ki paitbah ki la ong ruh ba ki paitbah kiba pule ïa katei ka khubor, kim dei ban pyrkhat da kumwei pat namar ba ka dei ka khubor kaba bakla, hynrei haduh mynta baroh ki sordar shnong bad ki paitbah ki dang ïaneh shkem ban don beit hapoh Meghalaya.
