Nongpoh, Nailar, 25: Ki riew rangbah na ki shnong ha ka thaiñ Umsiang, Ri Bhoi District ha ka shatri jong ka Umsiang Border Area Development Committee (UBADC) ki la mih ban ai khublei kyrpang ïa ka sorkar jylla ba la lamkhmat da ka sorkar MDA-2 ha ka jingïalam u Conrad K. Sangma kum u Myntri rangbah ba kane ka sorkar ka la wan rah biang ïa uwei na u MCS Officer, u Raja Brahma ban shimti kum u Project Director ka DRDA ha Ri Bhoi, nalor ba u bat ïa ka kyrdan kum u Additional Deputy Commissioner ka Ri Bhoi District.
Kum ban pynkynmaw, u Raja Brahma, uba la bat teng kum u BDO ka Umsning C&RD Block, u Border Magistrate u la shakri la kham bunsnem ha Ri Bhoi District bad tang ha kine ki khyndiat u bnai u la shah pynkynriah kam noh na Ri Bhoi sha Jaintia Hills, hynrei kaei kaba pynkmen ïa kitei ki riew rangbah, ka dei ka jingailad biang ka sorkar jylla ba un wan ban shakri ha Ri Bhoi kumba ki la lap ne shem ba u dei uwei na u ophisar uba don shisha ka jingkitkhlieh ban shakri ïa ki paidbah ka Ri Bhoi.
Katkum ka kyrwoh ba la phah da u Bah C. Muktieh, Secretary ka Umsiang Border Area Development Committee, u la ong ba kane ka Committee ka sngewkmen ban tip biang ba une u ophisar u la wan biang sha Ri Bhoi na ka bynta ban ai jingshakri sha ki paidbah bad kum ka Committee ka kyrmen skhem ruh ba ka jingailad biang ka sorkar ïa une u ophisar ban wan trei sha Ri Bhoi un lah ban trei kham na ka bynta ka jingmyntoi jong ki paidbah ka them RI Bhoi.
U la ong ruh ba ka Committee ka sngew ban ai khublei kyrpang ïa une u ophisar, ka dei ruh halor ka nongrim ba kum ki riew rangbah bad ki nongïalam katei ka thaiñ ki la lap ba ha ka jingshimti une u ophisar kum u BDO ka Umsning C&RD Block u la lah ban wan rah shibun ki kam pynroi sha ki shnong ba hap ha ka thaiñ Umsiang ha Ri Bhoi.
Kum ka Committee ka la pynpaw ruh b aune u ophisar la lap ba u dei shisha u ophisar uba lah ban ïa trei bad ki paidbah bad uba dei ruh u ophisar ba trei borbah met bad mynsiem ha kano kano ka kam pynroi ba donkam ki paidbah bad khamtam une u ophisar u la lah ban leh shibun ki kam pynroi bad na ka bynta ka shongsuk shongsaiñ ki paidbah ha ki shnong khappud.
Shuh shuh, ha kawei ka bynta na ka liang ka NPP Mawhati Constituency lyngba u Bah R.M Mukhim, ki la pynpsaw ka jingkhublei kaba kyrpang ïa ka sorkar jylla ba ha kane ka kynti ka la wan rah biang ïa une u ophisar bad ban thung ruh kum u Project Director ka DRDA bad kyrmen skhem kum u Project Director ka DRDA un dang lah ban wan rah shibun ki kam pynroi sha ki shnong nongkyndong ka Ri Bhoi.
Caption: Ki rang bad ki thei ïa kura kiba la ioh khur ïa ka takma ksiar na ka lymgpung Meghalaya Khelo India Pencak Silat’ League.
