Shillong, Nailur 12: Ka Thma U Rangli ka pynrem jur ïa ka kynhun ka seng shit niam Hindu kaba la kam ba la ïalam da u ta u riewkhuid Jagatguru Shankaracharya Swami Avinmukteshwarananda Saraswati kaba la ïaid kylleng ka Ri India ban ïawer paidbah sha ka jingïalang bad jingïa ïaid paidbah ban pyrshah ïa ka jingot doh Masi ka ban long ha Shillong ha ka 2 tarik u Risaw 2024. Ka jingthmu jong kane ka rally ki kynhun shitniam Hindu ka long ban dawa ban khang noh ïa ka jingot doh masi ha baroh kawei ka Ri India.
Kane ka jingkhot bad jingdawa ban khang ban ot doh masi ha ka Ri India ka dei ka mat ba ka kynhun shit niam ba heh paid jong ka niam Hindu ka thmu ban pynbor ïa kiwei pat ki jaitbynriew kiba pher kiba im ha Ri India ban im, ban bam bad ban ngeit kumba ngeit ma ki, ki heh paid Hindu. Phewse, kane ka long pyrshah ïa ka Riti Synshar ka Ri bad ka wanrah ïa ka jingpynïapher niam bad ka dei ruh ka jingleh donbor jong ki shitniam heh paid Hindu kiba thmu ban synshar donbor ïa ka Ri India bad kiba thmu ban phrung jubor ha ka synshar khadar bad imlang sahlang tang kawei ka ktien, kawei ka niam bad kawei ka kolshor.
Ka pyrthei India ka dei ban tip ba ki nongshong shnong ka Jylla Meghalaya ki dei kiba bam doh, naduh ka doh sniang, ka doh masi bad kiwei ki jait doh. Ki don ruh ki shnong hapoh ka Jylla Meghalaya ha kaba ki trai ri ki pyndonkam ne pynïap da ki sniang, ki masi ha ka phur ka siang ne ka kñia ka khriam. Kumta ka jingthmu ban pynlong ïa ka jingïaid paidbah ban khang ot doh masi bad ban pynïeng ïa kata ka lama ban ïada ne mane ïa ka masi ha Nongbah Shillong kam dei ka hok ban mane blei laitluid, hynrei ka dei ka jingpynibor bad ka jingsdang jong ka jingsynshar donbor ki kynhun shit niam ka niam heh paid Hindu.
Kumta ka TUR ka pynrem jur ïa kane ka jingthmu bad ka jingwan jong kane ka kynhun shit niam Hindu kaba wanrah ïa ka jingkulmar. Ka TUR ka dawa na ka Sorkar bad bor District ba kim dei ban ai jingbit bad ba ka Sorkar Meghalaya ka dei ban khang shi syndon ïa ka jingtreikam kane ka seng ha ka Jylla.
Lada ka Sorkar ne bor District kim khang ïa kane ka jingïalang paidbah kaba la khot da kane ka kynhun shit niam Hindu ha ka 2 tarik u Risaw 2024, na ka liang ka TUR ruh ka khot ïa baroh ki nongshong shnong kiba ngeit ha ka Riti Synshar bad kiba ieid ïa ka jingsuk bad jingshong suk ban ïalum ha kajuh ka jaka ba pynlong ïa kata ka rally khang doh masi. Bad na ka liang ki paidbah nongshong shnong ka Shillong pat kin pynlong da ïa ka jingïa bam doh masi bad kiwei de ki jait jingbam tynrai jong ki trai ri trai muluk ka Jylla Meghalaya.
