Shillong, Nailur 12 : Ka Jyotish Peethadheeshwar Shankaracharya Avimukteshwarandah (JPSA) kan pynlong ïa ka Gau Dhwaj ban pynbna ïa ka masi kum ka kmie jong ka Ri ha ka 2 tarik Risaw ha Shillong.
Kane ka seng ki Hindu kam shym la lah ban pynbna ïa kane lyngba ki lad pathai khubor hadien ka jingleit pyrshah jur jong ka seng Hynniewtrep Youth Council (HYC) hakhmat ka phyllaw jong ka Shillong Press Club mynta ka step sngi Palei. Ka tnad pulit kala pynkhlaiñ bha ïa ki bor pahara ha sawdong ka SPC ha kane ka jingwan pyrshah ka HYC.
Hynrei u Yogiraj Shailendra ha ka kyrwoh ula ong “Ngi la la pan la bun sien da ka jingthoh ban pynlong ïa ka jingïakynduh bad ki lad pathai khubor na ka Press Club of Shillong hynrei ngi khlem ïoh pdiang satia. Kumta, ngim shym la lah shuh ban ïakynduh ïa ki lad pathai khubor”.
Ka kyrwoh ka pyntip ruh ba u “Shankaracharya un sa wan poi ha Shillong, Meghalaya ha ka janmiet jong ka 1 tarik Risaw. Ha ka 2 tarik Risaw, un sa pynïaid ïa ka jingïalang ban pynïeng ïa ka Gau Dhwaj bad ai jingkren ha ka Gau Mahasabha. Hadien kane, un sa mih ban leit sa sha West Bengal”.
“Ka jingthmu jong ka Gau Dhwaj Sthapana Bharat Yatra ka long ban kyrsiew thiah ïa ki briew ba mane ïa ka Masi, pyniatylli ïa ki na kawei kawei ka daw bah-pynneh ïa ka burom bad ka iktiar jong ka masi, bad ban pynkup burom ïa a masi da ka kyrdan ‘Rashtra Mata”, kala ong.
Kala pyntip ruh ba ka Gau Dhwaj Sthapana Bharat Yatra kan sdang naduh ka 22 tarik u Nailur.
