Shillong, Nailur 12: U Myntri ka tnat Bording u Abu Taher Mondal ha ka sngi Palei u la ong ba ka Meghalaya Energy Corporation Limited (MeECL) ka pyrshang ban pynduna ïa ki jingduh bad ban kyntiew pat ïa ka rukom treikam ban pynbha ïa ka tnat.
Kane ka jingong jong u ka la long ha kaba ïadei bad ka kaiphod jong u Comptroller and Auditor General of India (CAG), kaba la pynpaw ha ka snem 2023-23, around 65% (Rs 371.17 crore) jong ka jingduh kaba T 572.28 klur kaba la kamai da ki 14 working SPSE ba la synniang da ki 2 tylli ki power sector SPSE – Meghalaya Power Generation Corporation Limited (MePGCL) bad ka Meghalaya Power Distribution Corporation Limited (MePDCL).
“Ngi dang peit halor kane ka bynta bad kam dei ruh ka kam kaba suk. Klet noh shaphang ka generation, distribution bad ka transmission wat kiwei ki jylla ki mad ïa kane ka juh ka jingeh. Ki don bun ki jingsngewkhia kum ka jingduna A&TC, ki jingsah ki bai bording bad kiwei kiwei,” ong u Mondal.
“Lada kane kajuh ka dor kam donkam da ka MePDCL, shu pyrkhat katno tylli ki surok, ki hospital, ki school, ki college yn lah ban tei. Kane kadei ka jingsngewkhia jong u Myntri Rangbah ka jylla ha kaba u la ong ruh ba lada donkam ban pynbha thymmai dei ban peit lang ha baroh ki liang,” u la ong da kaba bynrap “Kam dei ka kam kaba suk. Kam dei ruh ka kam kaba lah ban trei shi mied shi mied. Ki don bun ki jingeh, la ki dei ki jingshim kylliang, ki jingshim ram bad kiwei ki jingsiew wat ka jingsam ne kiwei kiwei.”
Haba kren shaphang ka jingpynkhie im biang ïa ka MeECL, u Mondal u la ong, “Nga long uba la kloi bad dei halor kane ba ngi dang ïatrei shitom. Phi lah ban ïohi ba ki la don shibun ki kam ban pynbha ha kine ki 2 snem ba la leit. Nga sngewnguh ïa u Myntri Rangbah ka jylla uba la ai ka jingkyrshan ha kaba ïadei bad ki kam pisa kaba ka tnat ka donkam.”
Haba ong ba mynta u snem ka don tang kawei ka jingpynlip bording u Mondal u la ong, “ki jingujor ki mih haba don ka jingpynlip bording namar ki don ki jingshna ki jingmaramot bad kiwei kiwei kiba la pynlong ïa ka tnat ban pynlip bording.”
