Buh teng ka High Court ïa ka jingkyrpad ban pynkynriah ia ki longiing ha Them Ïew Mawlong

Shillong, Nailur 12: Ka Meghalaya High Court ha ka sngi palei ka la buhteng ïa ka jingshim bishar halor ka jingkyrpad ban pynkynriah ïa ki 342 tylli ki longïing Them Ïew Mawlong, hadien jong ki saw taïew.
“Halor ka jingkyrpad ba la buh ki kynhun (parties), ïa kane yn sa bishar biang hadien jong ka 4 taïew,” ong ka ïingkashari ha ka hukum ba la pynmih ha kane ka sngi.
Dangshen lah ban ong ba ka sorkar jylla ka la bthah ïa u chief secretary ban khot ïa ka jingïalang kaba khatduh bad ka Harijan Panchayat Committee (HPC) shwa ban kut une u bnai bad ban aiti ïa ka kaiphod ha kaba ïadei bad ka jingtyrwa ban pynkynriah ïa ki 342 tylli ki ïing napoh Them ïew Mawlong.
Lah ruh ban ong ba u Symbud Myntri Rangbah ka jylla uba khmih ruh ïa ka tnat Urban Affairs u Bah Sniawbhalang Dhar u la pyntip, “Ngi la bthah ïa u chief secretary ban khot ïa ka jingïalang bad ka HPC bad ba un aiti ïa ka kaiphod kaba khatduh sha ngi bad ngin sa shim ïa ka rai kaba khatduh ha kaba ïadei bad kane ka kam.”
Na ka liang u Bah Dhar u la ong ba ka HPC ka la pan por bad kumjuh ruh ban ïakren ïa ki kam bad ki bor kiba halor.
“Namar kata, ka sorkar ka la rai ban ai ïa kane ka por ba ki la pan ha ka por ba la dep. U chief secretary un sa khot ïa ka jingïalang ha ka taïew kaba khatduh mynta u bnai bad un sa aiti ïa ka kaiphod sha ka sorkar na ka bynta ban ïoh shim ïa ka rai kaba khatduh,” u la bynrap.
U Bah Dhar u la ong ruh ba ka sorkar ka la shim ïa ka rai kaba khatduh ba kan ym pdiang shuh ïa kano kano ka jingïalang halor kane ka kam hadien jong ka jingïalang ka ban long ha ka taïew ba khatduh jong une u bnai.