Pynrem jur ka Hills’ Farmer Union, WJH kynnoh ba kren tohmet u rangbah ba kam nongkhaïi jhur

By Mawphor News Desk On Aug 31, 2023

Jowai, Nailar 30: Ka Hill’s Farmer Union West Jaiñtia Hills District, ka la ong ba kim lah satia ban pdiang ia ka jingkren tohmet jong u wei u rangbah ba tip kyrteng kum u Bah H Dkhar u ba kam ïalade ba u dei u nongkhaïi jhur, da kaba kynnoh ‘Dalal’ ïaka synjuk ki nongrep ka Hill’s Farmer Union.
Ka seng lyngba ka kyrwoh ka ong ba katkum ka vidoe kaba mih dang shen la iohi ia ka jingkren tohmet jong utei u nongkhaii ia ki nongialam jong ka seng halor ka nongrim baka HFU ka ïeng ban pynduh noh ïaka ‘Jingot kilo’ ïaki mar rep, ïa kaba la pdiang da ka sorkar jylla bad ruh ka Khasi Hill Autonomous District Council (KHADC).
Lyngba kane ka kyrwoh na u President ka Hill’s Farmer Union, West Jaiñtia Hills District u bah Mutshwa Thabah, ka seng ka sngewthamula, hana ba une u briew u sngew don mynsiem ban ïarap ïa ki nongrep, da kaba ‘Ot kilo’iaki mar rep bad ong ruh ban ym ‘Ot kilo’ lada ka ktah ïaki nongrep.
Ka seng ka don ban pynshai,ba kane ka jing ‘Otkilo’ka ktah ïa ka ïoh ka kot u nongrep bad ka dei ruh ka jing ban beiñ ïa u nongrep bad ki nongrep ki sngewduh nong namar ha man ka shiton ba ki die ïa ki mar rep, ki nongrep ki shah ot 100 kilo bad kane ka 100kg ki nongrep ki shu ai ei ïa u nongkhaïi bad hato kata kam dei ka jing duhnong? buh jingkylli kylla ka HFU na West Jaiñtia Hills District ïau ne u rangbah
Ha kine ki sngi, ba ka bai symbai, bai sboh, bai nongtrei bad kiwei kiwei ki la rem lut nadong shadong. Kumta ban ‘AI EI’ ïaki nongkhaïi 100 kilo naka shiton kadei ka bymlah ban pdiang bad kadei ruh jingduh nong bakhraw ïa ki nongrep.
Kumta na ka liang ki nongrep na West Jaiñtia Hills District ka phah ka khubor kaba shai ban long kiba ïatylli mlon ban pyrshah ïa ka jingot kilo, bad ki sngew duh nong haduh kata kata ban shu ot kilo ïaki mar rep ki ba ki la trei shitom da ka umsyep. La kyrpad ba ki bor ka aiñ naka sorkar ki dei ban pynduh pyndam ïa kane ka jingot kilo da ka aiñ kaba khlaiñ kaba yn lah shisha ban weng ïa u shah uba
thar ïaki nongrep.
Kumta lyngba kane ka kyrwoh, ka seng ka kren da kaba shai ba lada kwah ban ïohi ïaka jingïatylli jong u nongrep ban pyrshah ïaka jingot kilo, ki long kiba kloi ban mih da ki lakh ngut ha madan. Kumta da kane ki pynrem jur ïa une u briew uba shu kynnoh ‘Dalal’ khlem nongrim ïa ka seng, khlem da tip tikna ïaki nongrim treikam jongka Hill’s Farmer Union bad ngi dawa ba une u briew u dei ban pynshai halor ka jingkynnoh khlem nongrim jong u, lym kumta ka seng kan ai da kaba tyngeh.