Dawa ka HANM ban shna noh da ka surok Four Lane naduh Jowai Bypass shaduh Ratachera

Khliehriat, Nailar 30: Ka Hynñiewtrep Achik National Movement (HANM) Jaiñtia Zone ka dawa na ka sorkar ban shna noh da ka surok Four Lane naduh Jowai bypass ter ter shaduh Ratacherra khnang ban suk ha ka iaid ka ieng jong ki paidbah nongshong hapoh ka rilum Jaiñtia bad ruh ban lait na ka jingtwa khyndew kaba ju jia man la ka por ha Sonapur, namar dei tang da kane hi ka lad ka ban lah ban tehlakam ïa ka jingsah kut kali kaba man ka sngi bad ka la dei hi ka por ban pynheh noh ïa kane ka surok ha ri lum Jaiñtia.
Ka seng ka la pynpaw ba kane ka surok national highway na Jaiñtia ka dei ruh ka surok kaba wat ki briew kiba na bar ka jylla ruh ki ju ïaid bad katno ka long ka jingleh raiñ ïa ka sorkar ban shuh jia khah khah ka jing twa khyndew bad jingdheng kali, don ki por ba ki kali ki ju sahkut da ki bun sngi ha katei ka surok, ka jingtwa khyndew ha kitei ki bynta kam dei shuh kaba dang thymmai te kumta ka sorkar kala dei hi ka por ban pynheh noh shi syndon ia kane ka surok.
Ka seng ka kyntu ïa ka sorkar ba ka dei ban shim khia ïa kane bad lada kam shim khia, ka sorkar hi ka dei ban shim ïa ka jingkit khlieh ïa ka iaid ka ieng ki paidbah bad kam dei shuh ba kan shu peit tang ki khmat ïa ki jingeh ba ki paidbah ki iakyndhuh hynrei ka dei ban leh eiei na ka bynta ka jingbit jingbiang ki nongleit nongwan.
Ha kaba iadei bad ka jingkit palat pud ki trok kit mawshun, na ka liang ka seng ka dawa na ka sorkar ba kan khang noh shi syndon ïa kito ki trok kiba kit mawshun, kiba ju kit palat pud.
Kane ka jingkit palat pud ki kali kit mawshun kan sa wan rah pynban ïa ka jingsniew surok shaba palat naduh Mynkre shaduh Malidor, kumta lada ka sorkar kam leh eiei halor kane, ka seng kam banse ban leh da ki kam ban pyrshah ïa kito ki kali kit mawshun kiba kit palat pud kaba long pyrshah ruh ïa ka hukum jong ka ïingbishar High court, pynkut u kyrwoh na u President HANM Jaiñtia Zone, u bah Shaniahlang Suchen.