Phah dorkhas ka JNC sha u CM ba sahteng wanrah ïa ki tnat sorkar ki ban treikam pura noh na EJH

Khliehriat nailar 30: Ka Jaiñtia National Council Khliehriat Circle, hapoh ka jingïalam u General Secretary, u bah Mebanteilang Sukhlaiñ, mynta ka sngi jong ka 30 tarik u nailar, ka la buh da ka dorkhas hakhmat u myntri tangbah ka jylla bad ïa kane ka dorkhas la aiti lyngba u Deputy Commissioner ka East Jaiñtia Hills District, u Abhilash Baranwal, IAS, kane ka dorkhas ka long halor ka jing angnud ka seng ban wanrah ia ki khat san tylli ki tnat sorkar ki bym pat don hapoh ka district.
Ha kajuh ka por ka seng ka kyntu ïa u myntri rangbah ka jylla ba un shim khia halor kane. Ki 15 tylli ki tnat sorkar ki bym pat don hapoh ka district, ki kynthu ka ophis Assistant Registrar Cooperative societies, ka Assistant Director IPR, ka ophis jong u Joint Director of Schools Education & literacy, ka Divisional forest Office, (wildlife), ka Divisional forest Office (Social Forestry), ka Divisional forest Office (Territorial), ka District Librarian, ka ophis jong u Executive Engineer, (CEW) A.H & Veterinary office, ka ophis jong u Executive Engineer, PHE Electrical Division, ka ophis jong u Executive Engineer, PHE (RWS) Division, ka ophis District Sericulture Office, ka District Urban Planner/Town Planning Office, ka ophis jong u Executive Engineer, Urban Affairs, ka ophis District Handloom Office, ka ophis jong u Weaving Inspector.
Katkum ka dorkhas ka seng ka la ong ba “Ka East Jaiñtia Hills District ka dei kawei na ki district kaba ai lane pynïoh bun tam ka khajna sha ka sorkar bad ka jingioh district ba pura ruh ka la kot sha ki 11 tylli ki snem mynta hynrei haba phai pat sha ka roi ka par ka dei ka district kaba dang sah dien”
Na ka liang ka seng ka la pynpaw ruh ba ka jingbym pat don kitei ki tnat sorkar hapoh ka district ka buh jingeh haduh katta ïaki paidbah ha kaba ki hap ban leit shaduh sha Jowai bad sha Shillong lada don kino ki kam ba ki hap ba pyndep bad kane ka wanrah jingeh bha khamtam ïa ki duk ba kyrduh ha kaba ki hap ban pynlut ïa ka bai leit bai wan bad ba kaba eh ruh lada ba ym lah ban pyndep ïa ki kam ha ka shi sng, ki hap ban pynlut por haduh ar lai sngi ban pyndep kam.
Lyngba ka jingthoh ne ka dorkhas ka seng ka pynpaw ba kiba bun na kitei ki tnat sorkar ki bym don hapoh ka district ki dei kiba la i donkam shisha ban don hapoh ka district ban dup lah ban treikam pura bad kumjuh ruh lada biang ki tnat treikam kan iarap shibun ban kyntiew ïa ka district, kum ka tnat pule puthi, ka ban kyntiew shuh shuh ïa ka pule puthi ha ka thaiñ. Ha kaba ïadei bad ka tnat pule puthi ka seng ka pynpaw ka jingsngewkhia kaba jur bad ong ba ka la dei ka por ban don noh da ka ophis u Joint Director of Schools Education & literacy khnang ba kan kyntiew ïaka pule puthi ha ka thaiñ.
“Kumjuh ruh ka tnat Khlaw, kumba baroh ki tip ba ka East Jaiñtia Hills District ka don bun ki khlaw kiba rben bad khamtam eh ka Narpuh Wildlife Sanctuary kaba la paw bha, kane ruh ka don ha East Jaiñtia Hills District bad ki khlaw kyntang kiba don ha ki shnong ki thaw, kumjuh ruh ki paidbah kiba trei bun ki kam kiba donkam ïa ka tnat Forest, kumta donkam ban don ka tnat khlaw (Forest) ka ban treikam pura napoh ka district, kumjuh ruh kum ka tnat PWD ka ban peit ïa ka jingbit jingbiang ki surok ki lynti ki syngkien, ka tnat PHE ka ban peit ïa ka um bam, um dih, ka tnat Handloom ka ban kyntiew ïa kito ki briew ki don ka sap ban thaiñ jaiñ bad ban shna jingshna, khamtam la lap ba ki briew ha East Jaiñtia Hills District ha ki shnong bad thaiñ bapher bapher ki dei ki briew kiba don shisha ka sap ban thaiñ jaiñ, kumta kane ka tnat Handloom ka long kaba donkam ban don ban kyntiew ïa ki sap ka ban kyntiew ïa ka ïoh ka kot jong ki nongshong shnong”
“Ka seng ka ong ruh ba haba phai sha ka ophis PHE, ka ophis ka la don ha Khliehriat, kaba dei jong ka tnat Electrical bad ka tnat Distribution, ka long pat kaba donkam ban don da ka ophis jong u Executive Engineer (PHE) khnang ban dup lah ban treikam pura, namar ki SDO kim pat lah ban treikam pura.”
“Ha kaba ïadei pat bad ka tnat Khlaw, ka seng ka ong ba ka tnat Forest lei, watla ka ophis ka la don ruh, hynrei long kumba kam don, namar ki nongtrei kim pat lah ban leh eiei ruh napoh ka district, dang hap ban pyndep ïa ki kam ki jam baroh na Jowai, bad ruh ki nongtrei kiba don ha Khliehriat ki shu long tang kum kito ki nongpeit.
Kumta ka seng ka kyrpad jur ïa u Myntri Rangbah ka Jylla, u Conrad Sangma bad ka Sorkar ba ka la dei ban phai khmat noh sha kane ka thaiñ bad ban wanrah noh ïa kitei ki tnat sorkar bapher bapher hapoh kane ka District, namar ka jingbym pat biang lut ki tnat treikam jong ka sorkar hapoh ka district, ka buh jingeh haduh katta namar lada biang bad lada ki tnat sorkar ki lah ban treikam pura napoh ka district kan long ka jingmyntoi bad jingkyrkhu ïa ki paidbah bad haka juh ka por kan wanrah ïa ka roi ka kiew bad kan wanrah ïa ki lad ïohkam ïohjam jong ki paidbah jong ka district.
Ha ka ba ïadei bad kane ka mat, kum ka jingpyntip, ka seng ka la ai Copy ruh ïa ka dorkhas sha ar ngut ki MLA kane ka thaiñ, u bah Kyrmen Shylla bad i king Santa Mary Shylla, kiba long ki nongmihkhmat Jong kane ka thaiñ ba kin kren eiei lem halor kane ka bynta.