Pynpaw u kyrtong ka NPP Mawhati ba ka Civil Hospital, jaka pule bad u pud u sam ka mat ba hakhmat eh lada jop kum u MLA
Nongpoh, Rymphang 14: Haba kren haka jingïalang paidbah jong ka party NPP mynta ka sngi haka shnong Mawlasnai, u Bah Shemphang Lyngdoh kyrtong ka NPP Mawhati u la pynshai ba ka Mawhati Constituency ka dang donkam shibun ki kam pynroi nalor kiba la dep pynioh da u Bah Dasakhiat Lamare kum u MLA ka Mawhati.
Kum u kyrtong ka NPP na Mawhati, u Bah Shemphang Lyngdoh u la pypaw ruh ha kane ka jingïalang paidbah ka NPP ba ka thong kaba hakhmeh eh ba nongmihkhmat un leh lada ki paidbah ki ailad ha kane ka kynti ka long ban wanrah ïaka roi ka par naduh ka Civil Hospital ha Mawhati, ki jaka pule ba kynthup ïa ki College, ban peit kyrpang ïaka jingeh ki samla bad khamtam ïa u pud u sam kumba ka Mawhati kadei kawei na kiba dang sahkut haka jingpynïabeit pud.
Kum u kyrtong u ba la aireng ha kane ka elekshon u Bah Shemphang u la pynshai ruh ba u don shibun ki jingangnud ban thawdur bad pynkylla ïaka Mawhati Constituency khamtam u dei u briew u ba iohi jngai ban peit ïaka jingeh ki paidbah namar kumba long mynta ki samla ki dei kiba khlem kam khlem jam bad yn sa thaw ruh da ki Youth Policy ne ki Youth Development Programme, ban peit kyrpang ïaka jingeh ki nongrep, ban kyntiew ïaka koit ka khiah, ki jaka pule namar kumba long mynta bun naki samla pule na ka thaiñ Mawhati ki hap ban beh shaduh nongbah Shillong bad kiwei kiwei ki jaka bad hap ban jngai nala iing wat haka rta ba dang rit.
U la ong ruh ba hadien ka jingmih ban aireng ha kane ka elekshon kila don ruh ki briew kiba la pyrshang ban ber bih ba u dei u nongwei, hynrei u Bah Shemphang u la pynshai ba u dei u khun jong ka them Ri Bhoi bad katei ka jingkynthoh ka dei tang ban ber bih bad pynthohbria, hynrei kum ki paidbah kim dei ban ngeit biej namar u don ka thong shibun lada wan haka bor bad kyrpang ruh ïaki paidbah ban ai ka jingkyrshan ha kane ka kynti ba mynta.
Ha katei ka sngi la sakhi ruh da ki hajar ngut ki paidbah naki shnong Shilliang Umiam, ryngkat ka jingwan pynshit pynshngaiñ da ka kong Ampareen Lyngdoh, Ma Ngaitlang Dhar, ki nongïalam ka NPP Mawhati bad kiwei kiwei ki riew rangbah.