Shillong, Rymphang, 14: Ka Congress ha ka sngi Baar ka la dawa ba dei ban weng noh mardor ïa ki poster na ki nongkynti u paidbah ba la pynïeng khlem ïoh jingbit jong u Myntri Rangbahduh ka ri u Narendra Modi, u Myntri ka tnat Kam Pohing u Amit Shah bad ki nongïalam ka BJP.
Ha ka shithi ba la phah sha u District Election Officer jong ka East Khasi Hills, u General Secretary jong ka Meghalaya Pradesh Congress Committee (MPCC) u Sanjay Das u la ong ba kine ki poster jong u Myntri Rangbahduh ka ri, u Myntri ka tnat Kam Pohing bad u National President ka BJP la shu pyndait ha ki nongkynti u paidbah kum ha ki Electric Pole bad ha ki bynta bapher bapher jong ka nongbah Shillong bad kaba la pynsniewdur ïa ka nongbah Shillong da ki poster ba khlem ïoh jingbit.
U la ong ba kane ka dei ka jingpynkheiñ ïa ka Model Code of Conduct.
“Ngi dawa ïa phi ban weng lut kham kloi ïa kine ki poster na ki nongkynti ka Sorkar,” ong u Das ha ka jingujor.
