Pynlong prokram ha Star Cement Company Lumshnong halor ka 20th North East Metalliferous Mines Safty Week 23-24
Khliehriat kyllalyngkot 13: Ka tnat Directorate General of Mine Safty, Guahati Region myn ha ka 11 tarik mynta u bnai ka la pynlong bad rakhe ïa ka taïew ba kyrpang ba ïada ïa ki nongtrei par, lane ka 20th North East Metalliferous Mines Safty Week 23-24, ïa kane ka prokram la pynlong ha ka company dewbilat jong ka Star Cement Company Lumshnong.
Ki heh jong ka company ba kynthup u Unit Head, u Laxmaiah Munjala bad u K.G.Singh ki la lyntiew ïa ka lama Safty Flag bad îalam ïa ka jingpule ïa ka Safty Pladge.
Haba kren ha ka jingïalang, u D.V.Ranayya u la ai ka jingkhublei ïa baroh ki Mine Manager jong ka company kiba la shim khia ïa ka kam kaba ka la pynlong ba ym shym la don kano kano ka jingjia ba sngewsih ne ka jingmynsaw jong ki nongtrei ha ki par (Zero Accident Prone), u la ai khublei ruh ïa u DGMS halor ka jing pynkup burom ïa ki nongtrei kiba trei ha ki par maw shun jong ka company bad ong ruh ba kane ka prokram Safty Week ka ai ka lad ka kabu ïa ki nongtrei jong ki company ban ia phylliewjingmut bad pyni ïa kaei kaba bha kaba ki la leh bad jiei kiba dei ban leh ha ki par kaba ïada ïa ki nongtrei ba kin lait na kino kino ki jingma bad jingmynsaw.
U Mine Manager jong ka Brichyrnot Limestone Mine, u Nohar Singh, u la pynsgew ia ka PPT bad batai shai ruh shapahng ki jingtrei ba trei ha ki par mawshun halor kumno ban ïada ïa ki nongtrei ban lait na ki jingma bad jingmynsaw, kumjuh ruh ki kyndon ban ïada ïa ki nongtrei kiba long katkum ba la pyni ha ka Guideline na ka bynta kito kiba trei ha ki par maw shun.
Ha ka prokram la ia shim bynta ruh ki khynnah skul jong ka Star Public School kiba la ai ïa ka jingrwai Safty Week, la ioh ruh ïa ki dram lyngkot na ki nongtrei kiba trei ha ki par mawshun, ka dram kaba batai halor kumno ban iada ïa ki nongtrei kiba trei ha ki par ba kin lait na ki jingma bad jingmynsaw.
Kane ka jingpynlong ia kane ka prokram Safty Week ka long ruh kum ka jingpynshai ia baroh ki nongtrei kiba trei ha ki par maw shun ban long kiba phikir bha ban lait na ki jingma jingmynsaw.
Ia ka prokram la pyniaid da u CMRO, u Kanak Kumar Chhangni , la ïa don ryngkat lang ruh u Management Representative jong ka Star Cement, u Devender Bansal, u HOD-Mines jong ka Star Cement, u Dasari Venkata Ramanayya bad u K.G Singh, uba lam khmat ia ka kynhun, u Pramesh Saha, u Raj Kumar, u Dipanlar Borah lem bad ki nongtrei jong ka company Star Cement Lumshnong.