Pynlong ka RBI Shillong da ka ‘State Level Round of Quiz’ halor ka ‘Financial Literacy’
Shillong, Naitung :Ka Reserve Bank of India, Shillong ka la pynlong ïa ka Statelevel round jong ka “All India Quiz on Financial Literacy 2023” ha ka 10 tarik mynta u bnai hapoh Hotel Vivanta Shillong.
Ha kine ki ar bnai kiba la dep, ka RBI Shillong ka la pynlong ia kane ka jingïakop kyntip (Quiz) ha baroh ki block jong ki district ka jylla, ha kaba na baroh ki 9 tylli ki team kiba la wan ïashim bynta na ki district bapher bapher kila ïoh ban rung sha ka jingïakop ha ka State Level.
ïa kane ka prokram la wan plie da u Bah Olden Nongpluh, General Manager, Officer-in-Charge, RBI-Shillong ha ryngkat ka jingïadon lang u Pravin Bakshi, IAS, Commissioner & Secretary, Education Department, ka sorkar Meghalaya kum u Kongsan.
La pynlong ïa kane ka jingïakop kyntip da ka jingthmu ban pynphriang shuh shuh ïa ki jingtip ha kaba ïadei bad ki rukom treikam kiba ïadei bad ki kam pisa pilain, kata khamtam hapdeng ki khynnah skul bad ban pynurlong ïa kane ka jingthmu ban pynshai bad aibor halor kane ka bynta hapoh ka ri India hi baroh kawei.
Ka mat kaba ïadei bad ka jylla Meghalaya, RBI, Banking/Financial sector, Indian Economy kynthup ïa ka G 20 ki kynthup lang ha kane ka jingïakop kyntip.
Ka kynhun napoh Kendriya Vidyalaya, Happy Valley, Shillong ka la ïoh ban rah ïa ka nam lahduh ha ka State Level, katba kaba wan ba ar bad ba lai ki kynthup ïa ka Tura Public School, Tura bad ka Mawrong RMSA Secon dary School, Ri-Bhoi.
Kine ki nongjop ki la ioh ruh ban rah ïa ka khusnam kaba da ka song pisa kaba long T. 20,000/-, T. 15,000/- bad T. 10,000/- ha ryngkat ki khusnam bad ka syrnot.Nalor kata baroh ki kynhun kiba ïashim bynta ki la ïoh pdiang ruh ïa ki tiar ki tar kiba dei na ka kynhun G20 nalor ki syrnot ïashim bynta.
Ka lahduh ha kane ka jingïakop kan sa ioh ban mihkhmat ïa ka jylla ha ka Zonal Level Quiz. Ki nongïashim bynta ha ryngkat ki nonghikai na ki district bapher bapher ka jylla ki la pynpaw ka jingïaroh halor kane ka sienjam ba la shim da ka RBI na ka bynta ban pynlong ïa kiba kum kine ki jingïakop na ka bynta ki khynnah skul.