Shillong, Jymmang 22 : Ka Jyntru ka la khur jingjop da kaba pynliem kput da 9-4 pyrshah ïa ka Seng Samla Laitryngew ha ka lympung ïalehkai Meghalaya State League (MSL) 2023 ha ka jingïalehkai ha ka sngi Nyngkong katba ka Niaw Wasa Utd ka la pynliem da 2-1 kol pyrshah ïa ka Youth Club Pdengkarong haka jingïakhun ha madan Kiang Nangbah Stadium Jowai.
Ha kiwei pat ki Zone, ka Wasa FC ka la pynliem ïa ka Warima Youth Club da 3-1 ha ka jingïalehkai kaba dei jong ka Group D ha Tura Zone bad ka Riangdo YSCA ka la pynliem ïa ka Mawten SC da 1-0 kaba dei jong ka Group C ha Mawkyrwat Zone.
Haba phai ha ka jingïakhun ha Shillong, u Emanbha Marbaniang marwei u khyrwit saw kol (74, 79, 87, 90+5 min) na ka bynta ka Jyntru hadien ba u la mih madan kum u rangïalehkai shongben ha ka kylla mie. Baroh ar tylli ki kynhun ki la khmiih lynti ban ïoh ka jingjop kaba nyngkong jong katei ka lympung hadien ba baroh ar ki la ïakhaid bad mad nam rem ba mar shisien.
Ha ka jingïalehkai jong ka kylla step, baroh ar ki la ïakhaid da kaba thep mar lai kol. U Balanstar Taro u la pynkhih jar nyngkong na ka bynta ka Jyntru ha ka minit ïalehkai ba 14, hynrei u Johnplayson Lyngdoh u la thep ïa ka kol pynïakhaid na ka bynta ka Seng Samla Laitryngew minit ba 15.
U Banteilang Nongkynrih u la thep ïa ka kol kaba ar na ka bynta ka Laitryngew ha ka minit ïalehkai ba 18, katba ka Jyntru ka la ïoh ei ïa ka shi kol na ka jingbakala thep hi u rangïalehkai ka Laitryngew ha ka minit ïalehkai ba 22.
U Nongkynrih, u la lah ban pyntam kol biang na ka bynta ka Laitryngew ha ka minit ïalehkai ba 34 da kaba pyndei da ka khlieh kaba la wan lyngba ka jingshut free-kick, hynrei Badaminot Nongphlang u la ïoh ban thep ïa ka kol pynïakhaid na ka bynta ka Jyntru ha ka minit ïalehkai ba (45’+1).
Ha ka kylla miet, u Jefferson Nongphlang u la thep ïa ka kol kaba san na ka bynta ka Jyntru ha ka minit ïalehkai ba 74 shuwa ba u Ferenstar Kharkongor un ïoh ban thep ïa ka kol kaba saw na ka bynta ka Laitryngew ha ka minit ïalehka kaba 75 ha kaba ka jingïalehkai ka la long da 5-4. U Marbaniang hadien ba u la mih kum u rangïalehkai shongben ula thep haduh saw kol katba u Badaminot u la thep ïa ka kol kaba ar ha ka minit ba 89.
Haba phai sha ka jingïakhun kala long kaba ïakhiat bha hapdeng kine ki ar kynhun kila la ïakhun tyngeh bha bad kane kala pynhun ïa kiba nongwan peit kai mynta ka sngi. Ha ka jingïakhun hapdeng kine ki ar kynhun na ka liang ka Niaw Wasa United kala ïoh ban pynkhih ïa ka jar lyngba u Dashngiañ Sukhlaiñ ha ka minit ba 40, bad ïa ka kol ba ar da u Dreamson Suchiang haka minit ba 81 bad. Katba na ka liang ka Youth Club Pdengkarong ïa katei kawei ka kol la thep da u Marshal Nongrum ha ka minit ba 26 jong ka jingïakhun.
Katba ha ka jingïalehkai ha madan MDSA Ground ha Mawkyrwat, ka Riangdo ka la ïoh ban thep kol lyngba u Phinilboy Rashik ha ka minit ïalehkai ba 70 bad khur ïa ki lai point ba nyngkong eh ha katei ka lympung.
Ha Chandmari Ground ha Tura, ka Wasa FC went ka la kiew sha ka kyrdan kaba nyngkong na ka Group D hadien ka nam jop, da kaba khur 7 point haba ïanujor bad ka Khliehmawlieh kaba kamai 6. Ha kane ka jingïalehkai ïa ki kol na ka bynta ka Wasa la thep da u Koushik Rabha (8min), Silgrik Momin (41min) bad u F Momin (90+3min) katba ïa ka shi kol jong ka Warima la thep da u Tremarchwal Ch Marak (85min).
