Jowai, Ïaïong 25: Ka jingïalehkai jong ka lympung Under-16 Boys Inter District Cricket Tournament 2025 (Zone-1) kaba la long ha ka sngi Thohdieng (25 tarik Ïaïong, 2025) ka la jam sha kaba kut ha kaba ka kynhun ïalehkai jong ka East Jaiñtia Hills DCA kala pynliem da 55 ron ïa ka South West Khasi Hills DCA.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Ïa ka jingkynting pisa (toss) la jop da ka SWKHDCA kaba la kam trai ban kawang ball shuwa. Na ka liang jong ka EJHDCA haba shimti ïa ka pali tied ba nyngkong ka la lah ban kamai 183 ron shuwa ban khyllem baroh 10 wiket haka ober kaba 39.
U Ithuh Bha Dkhar ula long uba kongsan tam napdeng ki nongtied jong ka EJHDCA da kaba kamai marwei 76 ron na ki 91 bol kiba u la bynrap naki 13 tylli ki Fours (4s). U Wadkidamei Lapasam pat u la noh synñiang 36 ron na ki 28 bol kiba u la bynrap na kawei ka Six (6) pynbud bad 6 tylli ki Fours (4s). U Sunshinestar Nongsiej bad u Phrangborlang Syiemlieh, nongkawang ball jong ka SWKHDCA ki la khur mar 3 wiket.
Haba wanphai ban beh ïa ka thong ki nongtied jong ka SWKHDCA kim shym la lah satia ban kynjoh ïa ka ron kaba ki donkam, kata da tang 128 ron bad hap lut baroh 10 wiket ha ka over kaba 23.3. U Phibanaibor Iawphniaw (C) u la long tang ma u marwei u ba kham leh bha ha ka tied da kaba kamai marwei 41 ron na ki 40 bol kiba u la bynrap na kawei ka Six (6) pynbud bad 5 tylli ki Fours (4s). U Nikhil Dkhar (C), nongkawang ball jong ka ka EJHDCA u la lamkhmat ha ka bowling da kaba ïoh ban khyrwit marwei haduh 5 wiket na ki 6 ober.
Ka jingïalehkai mynta ka sngi Saitjaiñ (26-04-2025) kan long hapdeng ka SCA ‘B’ pyrshah ïaka WKHDCA naduh ka por 8 baje shiteng mynstep.
