1st Little Masters Trophy 2025 :Da ka hat-trick btin lynti u Abhinav ïa ka Meghalaya sha ka jingjop

Shillong, ïaïong 25: U Abhinav Khanal u la khyrwit da ka hat-trick ban pynthikna ïa ka jingjop kaba shongkun na ka bynta ka Meghalaya ha ka jingïalehkai pyrshah ïa ka Arunachal Pradesh ha ka 1st North East Little Masters Trophy 2025, kaba dei ka lympung ïalehkai na ka bynta ki khynnah shynrang U-14, ha Guwahati, ba la long ha ka sngi Thohdieng.
Haba tied nyngkong, ka Arunachal ka la shah pynkhyllem noh tang hapoh shi kynta tamna bynta 41 ron ha ki 14.1 ober na ki 33 ober ba la mang. Ka Meghalaya ka la pyndep ban beh ïa kane ka thong na ki 11.4 ober tang na bynta lai wiket.
Ka rukom ïalehkai kaba thikna jong u Abhinav ka la pynkordit ïa ka kynhun ki nongtied jong ka Arunachal ha kaba une u nongkawang bol jong ka Meghalaya u la khur ïa kaei kaei kaba jwat ban ïoh da kaba pynhap haduh 7/3 ha ki 3.1 ober, kaba kynthup ïa ka hat-trick.
U Abhinav u la pynkhyllem nyngkong ïa u Nabam Jamper ha ka bol ba nyngkong jong ka over kaba 11 bad nangta u la jam shakhmat ban pynhap sa arngut ki nongtied marïabud khlem da ailad ïa ki ban kamai ron. U la ïoh ruh ban pynhap sa ïa u wei u nongtied ka liang pyrshah ha ka bol kaba san ban khur 4 wiket ha ka shi over. Kane ka rukom ïalehkai kaba kyrpang ka la pynïoh ïa u ka hok ban khur ïa ka nam Player of the Match hadien ba la kut ka jingïalehkai.
Ka Arunachal ka la duh kloi ar ngut ki wiket ha ka shrip jong u Calvin P Syngkli (2/9 ha ki 3 ober) hynrei ka la lah ban kyntiew ïa ka ron na ka 4/2 sha ka 37 khlem da khyllem wiket shuh. Hynrei, dei hangne ba u Abhinav u la pynjot thiaw ïa ka kynhun liang pyrshah, ha kaba san ngut ki nongtied ki la shah pynhap khlem da ïoh ban kamai wat tang shi ron. U Tamser Ngurang u la noh synñiang kham bun ron wat hapdeng ki jingeh na ka bynta ka Arunachal da kaba kamai 18 ron shuwa ba un shah pynkhyllem ha ki kti jong u Abhinav. Uwei pat u wiket ban hap la khur da u Donsrang Chubat Sangma (1/2 ha ki 3 ober).
Ka la long kaba suk bha ban beh ïa ka thong, hynrei watla katta ruh, ka Meghalaya ka dang duh arngut ki nongtied lyngba ka run out bad uwei pat u la shah kem hadien. Hynrei na ka liang u Iaisan Khongji (11 ron) bad u Abdulla Pathaw (10 ron) kim shym la lah noh synñiang kham bun ban pynïajan ïa ka Meghalaya sha ka thong bad u Abhinav (6 ron not out) bad u Janggo K Marak (1 ron not out) ki la ïalam ïa ka kynhun sha shilliang ban khur ïa ka jingjop.
Kane ka dei ka jingïalehkai group kaba lai bad kaba khatduh jong ka Meghalaya. Ka la pynliem ïa ka Mizoram da 47 ron ha ka jingïalehkai ba nyngkong jong ka ha ka 20 tarik ïaïong shuwa ba kan shah rem ha ka Assam da 9 wiket ar sngi mynshwa.
Kumta ka Meghalaya ka don ha ka kyrdan kaba ar ha ka Group A. Ar tylli ki kynhun kiba wan hakhmat duh kin ïoh rung sha ka semifinal, bad lada ka Mizoram ka rem ha ka Assam mynta ka sngi ka Meghalaya ka la thikna ban jam sha semi final.