Jowai, Ïaïong 25: Ka lympung ïalehkai phutbol jong ka ‘First Warjaiñtia Invitation Football Tournament 2025′ bala pynïaid da ka Sports & Youth Sub Committee ka War Jaiñtia Students’ Union (WJSU) kala poi sha ka jingïakhun jong ka 3rd Quarter Final Match hapdeng ka Padu United Sports Club pyrshah ïa ka Nongkhrohrim Sports Club kaba la long mynta ka sngi Saitjaiñ ha madan Amshipai, Amlarem.
Haba phai sha ka jingïakhun kala long kaba itynnad shibun eh ha kaba ka Padu United Sports Club ka la jop da 3-1 kol ïa ka Nongkhrohrim Sports Club, ïa kitei ki kol na ka Padu United SC la thep da u June Buam haka minit ba 8, u Jeft Pakyntein haka minit kaba 19 bad u June Buam haka minit ba 72.
Na ka liang ka Nongkhrohrim Sports Club kala ïoh ban thep ïa ka shikol dei ha ka jingïakhun jong ka kyllamiet lyngba u Helmi Mukhim bad ka jingïakhun kala kut da 3-1 kol.
Lyngba kane ka jingjop jong ka Padu United Sports Club ka la jam sha ka Semi Final jong kane ka lympung ïalehkai football ba la khot pynlong da ka Sports and Youth Sub Committee ka seng WJSU.
Ka Football Committee jong ka Sports and Youth Sub Committee ka seng, ka pynbna paidbah ba ka jingïakhun kaba bud haka taïew ban wan kan long hapdeng ka Syndai Pyllun SC, Syndai (Selected Team) pyrshah ïaka Nongmadan Sports Club, Nongmadan (Prominent Football Club na Pynursla region, ha ka 3 tarik u Jymmang, 2025 (Saturday) ha ka por 2 baej nohphai sngi ha katei ka juh hi ka madan.
