Jowai, Ïaïong 25: Ka kynhun ïalehkai jong ka ka Mupliang SC kala lah ban pynliem da 8 wiket ïa ka West Jaiñtia Police CC ha kawei naki jingïalehkai jong ka lympung District Cricket League 2025 bala pynïaid daka West Jaiñtia Hills District Cricket Association (WJHDCA) ha ka sngi Thohdieng (25 tarik, ïaïong) ha Mini Stadium, Khliehtyrshi.
Ïa ka jingkynting toss la jop da ka Mupliang SC kaba la kam trai ban kawang ball nyngkong. Ka West Jaiñtia Police CC haba shimti ïa ka pali tied ba nyngkong kala lah ban kamai tang 104 ron shuwa ban khyllem lut baroh 10 wiket ha ka over kaba 25.2. U Devention Lyngdoh u la long tang ma u marwei u ba kham neh slem napdeng ki nongtied jong ka West Jaiñtia Police CC da kaba kamai marwei 30 ron na ki 56 bol kiba u la bynrap da 4 tylli ki Fours (4s). U Defender Dhar (C), nongkawang ball jong ka ka Mupliang SC u la khur marwei 4 wiket na ki 6.2 ober.
Ka Mupliang SC ha ka pali jong ka ban beh ïa ka thong, ka la lah ban pynjop da ka ba kamai 109 ron tang ha ki 17.3 ober bad khyllem tang 2 wiket. Baroh saw ngut ki nongtied jong ka Mupliang SC kiba mih madan mynta ka sngi ki la noh synñiang shi katdei na bynta ka kynhun ban beh ïaka thong. U Mewan Phawa u la tied 28 (41), u Byforcestar Dhar u la tied 26 (13), u Sandy Kharshandi u la tied 21 ron (khlem out na ki 16 bol) bad u Oniwaker Sna pat u la tied 19 ron (khlem out na ki 35 bol). U Devention Lyngdoh bad u Monjur, ki nongkawang ball jong ka West Jaiñtia Police CC ki la ïoh ban pynhap mar 1 wicket.
U Defender Dhar, kapten jong ka Mupliang SC u ba ïalehkai bha mynta ka sngi ha ka jingkawang ball, u la ïoh khur ïa ka nam Man of the Match.
Ka jingïalehkai mynta ka sngi Saitjain (26/04/2025) kan long hapdeng ka Young Lad’s CC pyrshah ïaka Evergreen Mukhla Mission naduh ka por 9 baje mynstep.
