Pynlehraiñ ka East Jaiñtia ïa ka NHAI bad Sorkar, thung kba, khwai hapdeng surok NH-6

Khliehriat/ Shillong: Hadien shi bnai tam ba ka KSU Narpuh Circle ka la aipor ïa ka NHAI ba kan moramot ïa ka surok NH-06, mynta ka sngi ka la sei madan syndon da ki kam ban pynlehraiñ ïa ka NHAI bad kumjuh ïa ka sorkar jylla, namar ba kane ka surok kadei kaba ïaid na Khliehriat shaduh Malidor bad kiwei pat ki jylla ka thaiñ shatei lammihngi jong ka ri India.
Kane ka jingpynlehraiñ ka long da ka jingïakhih ban thiah hapdeng jong kane ka surok ha Khliehriat ban pynpaw ka jingpyrshah ïa ka jingleh bym suidñiew ka NHAI bad ka sorkar jylla. Hapdeng kane ka jingïakhih, la ïohi da ki dkhot ka KSU East Jaiñtia Hills ryngkat ka jingkyrshan lang kiwei pat ki Sengbhalang, nangta ki nongïalam ka VPP East Jaiñtia Hills bad ki riew paidbah, ki la wan kit da ka khyndew bad theh hadpeng surok bad hadien kata pat ki la pynlong ka jingthung kba, namar ba kane ka surok ka jan baroh shi lynter ka la ïasyriem ïa ka Pynthor kba khamtam lei lei haba wan u slap. Ki paidbah naduh ki shynrang bad ki kynthei ki la ïa thung kba ha ka khyndew kaba la theh ha surok.
Hadien kane pat la mih sa ki ragbah bad wat ki longkmie ki la pynnoh khwai ha ki bynta kiba long kum ki pung hapdeng surok bad la ïohi ruh ba don kiba la teh da ki dohkha bad pynnoh khwai ha ki jaka ba long thliew jong ka surok kiba la long syriem hi ïa ki pung ri dohkha kiba rit.
Nangta ki la don ruh ki dkhot Sengbhalang bad ki riew madan kiba la ïathiah ha surok bad ym shym la shah ïa ki kali ban ïaid lait noh kito ki kali kiba kit nongpang.
Kane ka jingïakhih ka la sdang ha ka por 10 baje mynstep bad ka la kut ha ka por 4 baje janmiet. Hadien kane ka KSU ka la pynlong ïa ka jingïalang ha kaba la ïoh ïa ka jingkren na u President ka KSU East Jaiñtia Hills, u Samla Streamly Suchen na u Bah Damewanhi Rymbai, Organising Secretary ka VPP East Jaiñtia Hills, nangta ki nongïalam ka AJYO, FKJGP East Jaiñtia, JSU, HNYM, bad kumjuh ruh na uwei na ki nongsaid aiñ.
Hadien kane ka jingïalang, ha ka por 7 baje janmiet pat ka la sdang da ka jingbym shah ban leit jingleit jingleit da ki kali haduh 5 baje mynstep, lait noh ïa ki kali kit nongpang bad kiwei pat ki kali kiba ym lah kiar satia. Kane ka jingbym shah ban leit jingleit da ki kali kan neh haduh shi taïew.
Haba kren ha kane ka jingïalang, u Bah Damewanhi, u la ong ba ha ka jingleit ïakynduh dang shen ka Seng VPP ïa u Myntri Rangbah ka jylla, u Conrad Sangma, u la ïathuh ba ka sorkar pdeng naduh u snem 2015 ka la mang pisa haduh 200 klur tyngka ban moramot ïa kane ka surok. Hynrei haduh mynta balei ba ka NHAI ne ka sorkar jylla kam pyndep ban moramot ïa kane ka surok.
U Nongïalam ka VPP na East Jaiñtia Hills, u la ong ba ka don kaei kaei ha lyndet jong kane ka jingleh suki ka NHAI ne ka sorkar ban moramot ïa kane ka surok bad kawei na ki daw kan dei beit ba ka sorkar ka kwah ban pynpoi nioh da ka lynti rel sha East Jaiñtia Hills District. “Kaei kaba ngi la ïohi ha kine ki khyndiat bnai baladep, ka long ba ki bor sorkar jong ka jylla Meghalaya ki la pynpaw ka jingangnud ban kyniah noh ïa ka lynti rel na Byrnihat sha ki bynta jong ka East Jaiñtia Hills District”, u la ong, da kaba bynrap ba ki paidbah kidei ban sngewthuh bad husiar bha ïa kane ka jingleh jong ki bor sorkar.