Phet jyndat ka Liang Pyrshah halor ka Administration of Elaka Amendment Bill

Shillong, Nailur 25 : Baroh ki MDC ka Liang Pyrshah ki la phet jyndat na Iing Dorbar kum ka dak ban pyrshah ïa ka jingmynjur ïa ka Khasi Hills Autonomous District (Administration of Elaka) (Second Amendment) Bill, 2023.
Katei ka kynhun hapoh ka jingïalam jong u Bah Titos W Chyne ka la mih lut napoh Iing Dorbar hadien ba ka Liang Synshar kam shym la pdiang ïa ka jingtyrwa jong ki ban phah shwa ïa katei ka Bill sha ka Select Commitee hadien ba la dep ban ïathir ïatai halor katei ka Bill.
Na ka liang u Nongïalam ka Liang Pyrshah haba kren bad ki lad pathai khubor u la kynnoh ba ka jingmih jong ki kadei namar ba ka Executive Committee ka la leh da ka bor ban ym sngap ïa ki jingai jingmut jong ki halor ka Amendment Bill.
“Ngi la dep pynpaw ba la shu wanrah kyrkieh ïa kane ka Bill ha kaba la shu ai ïangi tang ha shwa ban sdang jong ka Dorbar Kyrpang,” ong u Bah Titos W Chyne.
Hynrei haba pynshai halor kane, u Deputy Chief Executive Member, Bah Pynshngaiñ N Syiem pat u la ong ba ka jingphet jyndat jong ki kam shongnia ei ei namar u la dep ban batai bniah bin pa bin halor ki mat ba ki wanrah ha ka jingïatai.
“Ngi la pynpoi ïa ki ha ka step sngi Thohdieng ba kin ïoh pule ha ka sngi Thohdieng, sngi Saitjaiñ bad sngi U Blei kaba long lai sngi. Wat ha Parliament ruh haba wanrah ïa ka Women Rersevation Bill ki ai ha kato hi ka step, kumta jongngi leit tang katto ym don jingeh,” u la ong.
Nalorkata, u ong ruh ba dei hadien ba ki la ïoh ban pynshai ïa baroh ki mat ba ki rah, ba kum ka Liang Synshar ka la rai ban ïaid shakhmat bad mynjur ïa katei ka Bill.
Nalorkata, u ïathuh ruh ba ïa katei ka Amendment Bill kin sa phah noh sha ka District Council Affairs.
Hadien kane pat, u Bah Titos u la buh ka jingkylli ïa ka Executive Committee kaba la rai ban phah sha ka Select Committee ïa ka Nongkhlaw Syiemship Bill, 2023 wat haba na ka Liang Pyrshah kam shym la kren ei ei.
“Ha ka jingshisha ka la biang ki la dei ban shu mynjur noh namar ym don mano mano (lait tang manga ba wanrah ïa ka Amendment) ba lah ban ieng ban ong ba dei ban rah sha ka Select Committee,” u la bynrap shuh shuh.
Shuh shuh u ong ba ka Bill kaba u khlem pyrshah ki la dei ban mynjur beit hynrei katei ka jingleh jong ki ka pyni ba ka Bill ka don jingduna bad kumta ban lait lehrain ki phah sha ka Select Committee.
U Nongïalam ka Liang Pyrshah u la ong ruh ba kum katei ka rukom leh kam pat ju jia mynno mynno ruh la ka long ha KHADC lane wat ha Iing Dorbar jong ka Ri ruh.
U Bah Titos u la kynnoh ruh ba ka Liang Synshar kala shu leh donbor khlem da burom shuh ïa ki kyndon.