Nongstoiñ, Lber 03: Ka Nonglang Pungsier Social Cultural Youth Club, ha ka sngi thohdieng ka la ïoh ban pynkut noh ïa ka lympung jingïalehkai kynjat bol ïa kaba la pynlong ha madan shnong Nonglang.
Ïa katei ka lympung la wan ban pynhap pyrda noh da u R.G.Momin MLA ka Rambrai Jyrngam konstitwensi kum u kongsan, ha ryngkat ka jingïadonlang u bah Ailand Lyngdoh sordar ka shnong Nonglang, bah Pynbiang Shylla President ka NPSCYC bah Treibor Marweiñ secretary ka NPSCYC bad kiwei kiwei ki riew rangbah jong ka thaiñ.
Ha ka jingïalehkai jong kiba hapoh ka 14 snem ka karta jong ki khynnah shynrang, ka Seiñduli ka la ïoh ban thep tang 1 kol la nod pyrshah ïa ka Mawsyrpat, ka jingïakhun jong ki kynthei pat ka NPScYC ka la shah pynrem noh ha ka Umwahlang haduh 2 kol la nod. Katba ha ka jingïakhun jong ki rangbah kiba la 40 snem tam ka karta, ka Kriangrin ka la ïoh ban pynbam haduh 2 kol la nod pyrshah ïa ka shnong Thawiar.
Kum shibynta ban pynshit pynshngaiñ shuh shuh ïa katei ka lympung ha katei ka sngi, ki samla jong ka thaiñ ki la ïoh ban ïashimbynta ruh ha ki jingshad bad ki jingrwai bapher bapher.
