Nongstoiñ, Lber 03: Ka shnong Siejlieh ha ka sngi saitjaiñ ka la ïoh ban pynkut noh ïa ka lympung jingïalehkai kaba la tip kum ka Inter Dong Cricket Tournament 2024, ïa kaba la pynlong da ka Siejlieh Sports Social and Cultural Youth Organization.
Ïa katei ka lympung la wan ban pynhap lama noh da u bah L.G Nongsiej MDC barim ka Nongstoiñ kum u kongsan, ryngkat ka jingïasynranlang u samla Deborland Kharsyntiew Secretary ka shnong Siejlieh Nongstoiñ, samla Ben Hahshah Secretary ka Siejlieh Sports Social and Cultural Youth Organization bad kiwei kiwei ki riew rangbah jong ka shnong.
Ka jingïalehkai ka la long kaba ishit ishngaiñ bha ha kaba na ka liang ki kynthei ka Dong Mawïaban ka la ïoh ban pynliem noh ïa ka dong Pdengshnong, katba na ka liang ki shynrang pat ka Seven United Mawthohthang ka la ïoh ban pynliem noh ïa ka Dong Pdengshnong da 6 Wicket na ka target ba la buh da ka Pdengshnong haduh 104 runs.
Ïa ka nam kum kiba kynsai tam ha kane ka lympung la ïoh ban khur da ki ar ngut ki samla kaba kynthup ïa ka Wanpynshai Syiemlieh na ka dong Mawïaban bad u Banteilang Ïawphñiaw na ka Seven United Mawthohthang.
