Mawkyrwat, Lber 03: Ka Sei-La-i-Sap Organisation, Mawlangwir ka la ïoh ban pynhap pyrda noh ïa ka lympung ïalehkai Volleyball ba lai sngi ne ka 3 Day Volleyball Tournament 2024 kaba la pynlong ha Madan Saitsnad, Mawlangwir South West Khasi Hills District.
Ha kane ka sngi, u bah Working Sangriang, General Secretary jong ka NPP South West Khasi Hills District ula long kum u kongsan ban wan pynhap pyrda noh ïa kane ka lympung ïalehkai.
Ha kane ka lympung ïalehkai volleyball na baroh ki kynhun ïalehkai, ka NPNKG. Na Nongkynbah bad ka DNR na Shnong Sarin ki la long ki kynhun kiba poi ha ka phainal.
Ha ka jingïalehkai ka NPNKG ka long ka lahduh da kaba ka la lah ban pynliem noh ïa ka DNR da 3 set bad ïoh rah ruh ïa ka song pisa kaba T. 30 hajar tyngka bad ka DNR T. 10 hajar tyngka ha ryngkat ka khusnam.
Ha shwa ban pynïalehkai la ïoh ban pynlong ka jingïalang ba lyngkot ha kaba la ïohh jingkren na u bah W. Sangriang kum u kongsan bad na u bah Bokstone Thongni kum u symbud kongsan, na u bah A.B.Shylla, Secretary jong ka Mawlangwir Sport Club kum ka dak ban ai mynsiem ïa ki rangïalehkai kumjuh ïa ka “Sei-La-i-Sap Organisation”, ba kan nang lah ban pynlong kum kine ki jait jingïalehkai ban kyntiew ïa ki samla kiba don ïa ka sap ka phong ba kin lah ruh ban nangkiew shaphrang ha ki kam ïalehkai.
Ka Sei-La-i-Sap Organisation, ka la ïoh ruh ban ai sngewbha ïa u bah K. Wanniang kum u Best Smash bad ïa u bah W. Snaitang kum u Best Player ha kane ka lympung ïalehkai jong ka 3 Day Volleyball Tournament 2024.
