Shillong, Nohprah 13: Ka Meghalaya Athletics Association ha ka 13 tarik Nohprah, 2024 (sngi Thohdieng) ka la ïoh ban pynkup burom da ka song tyngka ïa u heprit Rikanku D Sangma u ba wanrah nam ïa ka Jylla da kaba khur takma ha ka 39th National Junior Athletics Championship kaba long ha Bhubaneshwar, Odisha.
Kane ka la wan hadien ba u heprit Rikanku u la lah ban pynïoh takma kaba nyngkong eh hadien 25 snem ïa ka Jylla ha ki jingïalehkai Athletics ha ki lympung heh ha ka ri ne ka National Level, kata ban khur takma rnong ha ka thup kyrdan U-14 ha ka jingïalehkai Javelin da ka jinglah ban kawang haduh 51.91 meter.
Kane ka jingpynkup burom la pynlong ha kamra jingïalang jong ka Meghalaya State Olympic Association, Polo. La pynïaid ïa ka jingïalang da u President ka MAA – Bah EMH Passah, bad la ïoh jingkren na u General Secratary – Bah Finely L Pariat, ha ka jingïadon ryngkatlang u Vice President-Bah Joel Marbaniang, nangta ka Kong Daisy Marweiñ-Senior Coach bad u Bah Pleasantly Synnah-Coach bad ha kajuh ka por u Joint Secretary ka Meghalaya Athletics Association.
Khyndiat U heprit Rikangku D Sangma ba dang 12 snem ka rta na ka shnong Karukol Jalaigre uba leit skul ha Karukol Higher Secondary School kaba don kumba 5 kilometer eiei na Baghmara ha rilum Garo u la thaw histori ha ka 39th National Junior Athletics Championship kaba long Bhubaneshwar, Odisha 2024.
Lah ban kdew, namar ba u Rikanku D Sangma u dei u khynnah u ba shong ba sah haduh Baghmara, ka Kong Daisy bad u Bah Pleasantly ki la thaw da ka lad ban ai jinghikai ïa utei u khynnah lyngba ka online ban saiñdur ïa ka sap tad haduh ba un da lah ban seisoh bad khur takma ha ka jingïakop Javelin.
Haba ai jingkren ha katei ka sngi, na ka liang jong u Bah Finely L Pariat u la ai khublei ïa baroh arngut ki coach, ka Kong Daisy Marweiñ bad u Bah Pleasantly Synnah kiba la trei shitom ban ai jinghikai ïa u Rikanku D Sangma ban pynkhreh ïa katei ka Championship ha Bhubaneshwar, Odisha.
U Bah Finely u la pynpaw ruh ïa ka jingsngewkmen ba u Rikanku u la kylla long u nongïalehkai u ba ar na Meghalaya (ha ka Athletics) ban khur takma ha ka National Junior Athletics Championship – da kaba kdew ba katei ka lympung ka dei ka jingïakop kaba heh duh na bynta ki kyrdan Junior.
“Kane ka long ka jingkyrkhu ïa ka Jylla ba ngin lah ban sei ïa ki khynnah ha ki National Level…Wat ka AFI ruh ka la ong ba u don ïa ka sap hynrei ka shong pat ha ngi kumno ba ngin saiñdur ïa u ha ka jingïalehkai Javelin,” u la ong.
U Bah Finely u la pynkut da kaba ong, “Ngi hap ban saiñdur ïa u ha ka rukom kaba biang khnang ba un lah ban kiew shaphrang ban kylla long u lahduh hapoh ka ri (National Level) ha ki lympung ba heh duh ki kyrdan Junior bad wat ha ka International Level”.
