Shillong, Risaw 31: Ka jingkyrmen jong ka 7 Wasa United ban bteng ïa ka lynti ïaid ha ka lympung Meghalaya State League 2024 ka la shah pynduh noh da ka jingshah rem ha ka Mawtari Myrdon ha ka jingïalehkai jong ka Group E ha Wahiajer, ha ka sngi Palei.
Dei tang kane kawei ka jingïalehkai ha katei ka sngi bad la sakhi ïa u Silbestar Kharbani (54’, 70’) u ba la pynkhihjar ar sien na bynta ka Mawtari Myrdon ban khur ïa ka jingjop.
Shuwa ba kine ki arliang mamla kin ïakhun pyrshah, ka Mawtari Myrdon ka la sdang da ka jingjop ha ka jingïalehkai ba nyngkong pyrshah ïa ka Seinbhalang Shkentalang da 3-1 kol lai sngi mynshuwa, katba ka 7 Wasa ka la shah rem haduh 9-0 kol ha ka Shillong Lajong ha ka sngi plie pyrda kaba la long ha ka sngi Saitjaiñ jong ka taïew ba ladep.
Ka jingshah rem ka mut ba ka 7 Wasa, kaba dei ka lahduh ba nyngkong jong ka lympung MSL, kam donlad shuh da kumno kumno ruh ban ïohrung sha ka quarterfinal watla ka dang sah sa shi sien ïakhun na ka Group-E pyrshah ïa ka Seinbhalang Shkentalang.
Kawei pa kawei ka kynhun ba bat kyrdan ba hakhmatduh na ki hynriew tylli ki Group ryngkat bad ki ar tylli ki kynhun kyrdan ba ar kiba kham tbit kin ïoh ban rung sha ka wat ïakhun knockout round jong kane ka lympung.
Kumba ka long mynta, ka Lajong bad ka Mawtari Myrdon ki la ïoh ban khur mar 6 poiñ, kaba mut ba ka kyrdan ba nyngkong bad ba ar jong ka Group E ka shong ha ki kti jong kine ki arliang mamla.
Ha kane ka sngi Thohdieng (01 tarik Naiwieng) kin don san tylli ki jingïalehkai lait noh ka Group E ha Wahiajer.
