Mawkyrwat, Risaw 31: U Jimmison Marweiñ, 18 snem karta na ka shnong Mawranglang-Nongmawlein, South West Khasi Hills District uba shong mynta ha ka 1st Semester hapoh ka Sngap Syiem College, Mawkyrwat u la long uwei na ki khlur ba paw ha ka jingïakop ïa khun kti, da kaba u la wanrah ïa ka nam jong ka jingjop ha ka Asian Arm Wrestling Cup 2024 kaba la long ha Mumbai – India naduh ka 19 haduh 27 u Risaw, 2024.
Lah ban kdew ba ka jingjop jong u Jimmyson Marweiñ ha ka jingïakop ïa khun kti ka dei ha ka Junior Boys ba 70 kg u la jop ïa ka takma ksiar ne Gold Medal ha ka kti kadiang ne Left Hand bad takma rupa ne silver medal ha ka kti kamon ne Right Hand.
Haba kren ha ki lad pathai khubor, u samla Jimmison Marweiñ u la ïathuh ba ka jingsdang jong u ïa kane ka jingïakop ïa khun kti ka dei lyngba ka program ba kyrpang hapoh Sngap Syiem College, Mawkyrwat ka College Week 2023 bad nangne u sngewthuh ba ka jingïakop ïa khun kti ka dei kawei na ki sap kyrpang ba U Blei U la ai. Namarkata, kata u la sdang ban kilanmet ha kane ka kam lyngba ka jingpyni lynti jong ki nonghikai bad kumjuh ruh da kaba u la pyndonkam hok ïa ka Gym Center kaba don hapoh ka Sngap Syiem College, Mawkyrwat.
“Da ka jingtrei shitom jong nga ha ryngkat ka jingaimynsiem jong kiba ha ïing ha sem, u nonghikai (coach) bad ki nonghikai naduh u Principal jong ka Sngap Syiem College, Mawkyrwat nga sa poi sha ka thong jong ka jingjop ha kane ka jingïakop ïa khun kti hapoh ka Asian Arm Wrestling Cup 2024 kaba la long ha Mumbai – India”, ong u samla Jimmison Marweiñ.
Ha kajuh ka por na ka liang u Dr. K.K. Nongsiej, Principal jong ka Sngap Syiem College, Mawkyrwat u la pynpaw ka jingsngewkmen halor ka jingwanrah nam wanrah burom jong u samla Jimmison Marweiñ uba dei ruh u samla pule hapoh ka kolej namar da ka jingpyni lynti jong u kan ai mynsiem de ïa kiwei pat ki samla kynthei bad shynrang ba kim dei ban pynleh noh ei ïa ka sap la ha kano kano ka bynta hynrei ki dei ban pynpaw ha ka pyrthei khnang ba kin nang kiew ym tang ha ka pule puthi hynrei wat ha ki kam ïalehkai ruh.
Kum ka dak jong ka jingkmen bad sngewsarong ba u Jimmison Marweiñ u la wanrah nam, ka Sngap Syiem College, Mawkyrwat hapoh ka jingïalam jong u Principal mynta ka sngi ha ka jingpynkut ïa ka College Week 2024 ki la pynkup burom ïa u ha ryngkat ki kyntien ai mynsiem.
