Mynta ka sngi yn sdang ka SSA Super Cup 2026

Shillong, Oct 12: Ka lympung phutbol Super Cup 2026 jong ka Shillong Sports Association kan sdang naduh mynta ka sngi Hatmajai da ka jingïalehkai playoff ba nyngkong hapdeng ka Nongkseh pyrshah ïa ka Sawmer – ban long ha ka por 2:45 baje mynsngi.
Hadien ka jingpynkut ïa ka Shillong Premier League ha ka sngi Saitjaiñ, baroh ki phaikhmat mynta sha ka Super Cup, ka lympung ïalehkai kaba tang shi wat lane knockout kaba la wanrah da ka SSA ha u snem ba la dep.
Kane ka lympung ka wanrah lang ïa ki hynriew tylli ki kynhun ba wan hakhmat eh lane ki Top 6 jong ka SPL – ba kynthup ïa ka lahduh kata ka Mawlai, nangta ka runners-up kaba dei ka Shillong Lajong bad ki kynhun ba wan kyrdan ba lai haduh hynriew – ka Nongkseh, Langsning, Meghalaya Police bad ka Sawmer.
Ka Mawlai bad ka Lajong ki la ïohrung beit beit sha ka semifinal, katba ki saw tylli kiwei pat ki kynhun kin hap ban ïakhun ïa ka playoff.
Ka Lajong kadei ka lahduh ka ban ïada ïa ka khusnam jong kane ka lympung – ka la pynliem ïa ka Rangdajied United (ka bym shym la ïohrung mynta u snem) ha ka phainal jong u snem 2025. Ki lympung ïalehkai kiba kum kane ki lah ban wanrah ïa kaei kaei kaba pynkyndit, kumba la jia ha u snem ba la dep haba ka Rangdajied kaba wan kyrdan ba san ha ka SPL 2025, ka la lah ban rung shaduh ka phainal.
Ka jingïakhun knockout ka wanrah ïa ka jingïalehkai kaba kham pher na ki nongïalehkai – naba kim lah ban ïalehkai tang ban ïakhaid namar man la ki jingïakhun ki hap ban pynmih ïa ka kynhun nongjop. Ki jingïalehkai ba ïakhaid hadien ka 90 minit kin jam beit beit sha ka por pynjlan bad nangta, lada donkam, ka penalty shootout kan treikam ban rai ïa ka nongjop, kaba la thikna ba kan pynshongshit ïa ki paid nongkyrshan.