Shillong, Risaw 31: Ka Nongthymmai SC ka la lah ban wanphai da ka namjop da kaba pynliem ïa ka Nongrim Hills SC da 3-0 kol ha ka lympung OC Blue Shillong Premier League 2024 kaba la long ha ka jan miet sngi Palei ha SSA Stadium – First Ground, Polo.
U Michaelson Kurbah (40’), u Ronald Singh Shaikhom (57’) bad u Istarbor Marngar (59’) ki la long ki rangïalehkai kiba la ïoh pynkhihjar na bynta ka Nongthymmai ban khur ïa ka namjop kaba nyngkong mynta ka samoi. Kane ka dei ruh ka jingkut ka lynti ïaid ba rem 7 sien lynter, haba phaidien bad ka SPL 2023.
Ki rangïalehkai liang kadiang jong ka Nongthymmai ki la trei shitom bad ki la ïoh ban pashat ïa ka bol kaba thikna ha ka 40 minit na bynta u Michaelson ban pynkhih ïa ka kol kaba nyngkong bad lamkhmat ïa ka kylla ba nyngkong.
Haba bteng biang ïa ka jingïalehkai ka kylla miet, u Ronald u la ïoh ban thep sa ïa ka kol kaba ar na bynta ka kynhun hadien ba u la lah ban pyllait lyngba u rangapkol ka Nongrim Hills- u Urbanity Makhroh.
Ar minit hadien, u Ronaldu la ïarap pashat ïa ka bol na bynta u Istarbor ban pynkhih ïa ka kol kaba lai kaba la pynthikna jingjop ïa ka Nongthymmai.
Na ka liang jong ka Nongrim Hills ka la ïoh shibun ki kabu ban pynkhihjar hynrei kam shym la lah ban pynurlong lane ban pynliem ïa u rangapkol ka Nongthymmai – u Roni Das.
Kane ka jingjop na bynta ka Nongthymmai kamut ruh ba baroh 10 tylli ki kynhun ki la ïoh ban khur jingjop ha ki jingïalehkai jong ki mynta ka samoi bad ki don san tylli ki kynhun ba dang khur 3 poiñ – ba kynthup ïa ka Rangdajied United FC, Nangkiew Irat SC, Nongthymmai, Ryntih FC bad ka Langsning FC.
Ka Nongthymmai kan wanphai biang ha kawei pat ka jingïalehkai jong ka OC Blue SPL 2024 ka ban long ha ka 04 tarik Naiwieng pyrshah ïa ka Laitkor SC ha ka por 5 shiteng janmiet.
