Shillong, Risaw 12: Ka HITO ha ka sngi Palei ka la buh jingkylli ïa ka sorkar jylla lyngba ka Myntri ka tnad Law jong ka sorkar jylla, Dr. M Ampareen Lyngdoh halor ka jingbymdon ka bhah pule na bynta ki samla pule ka jylla kiba pynkhreh ban bteng ïa ki jingpule jong ki ha ki lain bapher bapher.
Haba kren bad ki lad pathai khubor hadien ka jingkynduh ïa ka Myntri, u President ka HITO, Bah Donbok Dkhar u la ong ba katkum ka jingtip ba ki ïoh lyngba ka RTI ka kdew ba ba haduh mynta ka sorkar kam pat don kano kano ka jingpynbna ne ki jingbthah ba kan don katei ka bhah na ka bynta ki samla pule kiba kwah ban bteng ïa ka jingpule doktor, engineer ne kino kino ki kyrdan pule ha ki kyrdan ba kham shajrong.
“Katba ka Expert Committee ka dang ïa kren, ngi thoh sha ka sorkar jylla ba nangne shakhmat haba ïadei bad ka bhah pule dei ban pynmih da ki kynja notification lane ban rah ha ka cabinet bad wanrah da ka ordinance na bynta hynriew bnai khnang ba kiba dei hok ban ïoh kin ïoh lyngba ka bhah pule,” u la bynrap shuh shuh.
La ïathuh ruh ba na ka liang ka Myntri ka la kular ba kan rah ïa kane ka mat sha u Myntri Rangbah ban ïa syllok ban pynsngew halor ka jingai jingmut kaba wan na ka seng.
Na ka liang u President ka HITO u la ong ruh ba kin ïai buddien ïa kane ka kam na bynta ka jingmyntoi jong ki samla pule.
