Shillong, Risaw 12: Ki nonghikai ka skulbah NEHU hapoh ka shatri North Eastern Hill University Teachers’ Association (NEHUTA) mynta ka sngi ki la pynlong ïa ka jingïakhih da kaba ïaid paidbah na Central Library shaduh ka ophis treikam u Vice Chancellor (VC) ka NEHU u Prof PS Shukla.
Kane ka jingïakhih ki nonghikai NEHU ka dei ban dawa na u VC ba un khot ïa ka jingïalang ba kyrkieh jong ka Academic Council, ban ïathir sani halor ka jinglong jingman ka skulbah NEHU bad ka jingpyntreikam ïa ka National Education Policy (NEP) 2020.
Ha kane ka rally la wan ban ïashim bynta lang da ki dkhot ka Meghalaya College Teachers Association (MCTA), NEHUSU bad ka KSU nalor ki samla pule bad ki nongtrei ka skulbah NEHU.
Haba kren ha kane ka sngi u President ka NEHUTA u Prof. Lakhon Kma ula ong ba ha shuwa ba ki nonghikai kin shim ïa kane ka rai ban ïakhih, ki la dep kyntu ïa u VC ba un khot pynlong ïa ka jingialang ba kyrkieh jong ka Academic Council lane ka Emergent Academic Council meeting hynrei na ka liang u VC ula pynibor pynban da kaba kyntait mardor ïa ka jingkyrpad ki dkhot ka Academic Council.
U Prof Lakhon ula ong ba jan baroh ki nonghikai na ka skulbah NEHU Shillong Campus, Tura Campus bad na ki College kiba ïasoh bad ka NEHU ki la phah jingthoh sha u VC ba un khot pynlong ïa ka jingïalang ka Academic Council.
“Ngim dei ki seng lehnoh ba ngin rung jubor ha kamra treikam jong u VC hynrei ngi dei ki nonghikai kiba don ïa ka jingkitkhlieh namar kata mynta ngi dang shu ïeng habar ka ophis treikam jong u ban ïakren. Hynrei ynda la dei ka por ban rung sha kamra treikam jong u, ngin sa rung namar mynta ka dang dei tang ka Pre Quarter Final bad ynda la poi ka jingïakhih ha ka Semi Final ngin sa rung sha kamra treikam jong u ban dawa syndon ba un shongthait noh kum u VC ka NEHU lada u sngew ba kane ka skulbah ka dei jong u shimet” ong u Prof. Lakhon.
U Prof. Lakhon ula ong ba kane ka jingshim rai marwei da u VC ban pyntreikam ïa ka NEP ka paw shai ba u kheiñ ba ka NEHU ka dei ka jong u shimet namar ula ïaid lait na ka rai jong ka Academic Council.
