Haduh 138 ngut ki longkmie ba pyndep ia ka jinghikai shna ashar ha Ri Bhoi

Nongpoh, Risaw 12 : Ka tnad Horticure jong ka Ri-Bhoi District haka jingïatreilang bad ka tnad Food Processing jong ka sorkar Meghalaya, mynta ka sngi kila pynkup burom ïa kumba 183 ngut ki longkmie na Ri-Bhoi District kiba la pyndep ïaka jingshah hikai kumno ban shna bad pynmih ïa u ashar haka rukom kaba dei, bala bei pisa da ka Meghalaya State Skills Development Society haka jingïalang kaba la long ha ophis ka District Horticultre Officer, Nongpoh.
Ha katei ka jingïalang pynkup burom ïa kitei ki longkmie la wan ruh ban shimbynta da u Bah Mayral Born Syiem MLA ka Nongpoh kum u kongsan haka jingdonlang u Bah Macbool L Suiam OSD ka tnad Food Processing, kong BM Umlong Joint Director ka tnad Agriculture, kong FN Sun District Horticulture Officer, kong A Kharbudon Program Manager ka MSSDS, Bah Androny Lyngkhoi Technical Associate ka tnad food Processing bad kiwei kiwei ki riew rangbah.
Kum ban shu kdew hangne ba kitei ki longkmie kiba la shah pynkup burom ki dei kiba la pyndep pura ïaka jinghikai ba 1 bnai lynter halor ka jingrukom shna bad pynmih ïa ki jait ashar bapher bapher da ka jingangnud ruh ba kin lah ban ïeng hala ki jong ki kjat bad lyngba katei ka prokram ai jinghikai kala long shisha ka jingmyntoi ïaki longkmie ba kin nang kiew shaphrang haka kam shna ashar kum ka lad iohkam bad kamai, kumba u ashar udei uwei naki jait jingbam ba paw bad pyndonkam bha haka ri India.
Haba kren maitphang ha katei ka sngi naka liang u Bah Androny Lyngkhoi Technical Associate ka tnad Food Processing u la ong ba ka thong jong katei ka project ban ai jinghikai sha ki longkmie ban shna ashar ka long ban pynïar, ban pynbha bad ban pynjanai shuh shuh ïaka rukom shna ashar naduh ka rukom thep, ka ïew ka hat namar bun naki nongshna ashar khamtam kiba ju die haki surok bah National highway kim ju leh haka rukom kaba janai naduh ka rukom thep, ka dor, ka tarik shna bad tarik kut, ki jingkhleh ba pyndonkam haka por shna, FSSAI License Number bad kiwei kiwei ba kane ka pynartatien ïa kiba bun khamtam ki briew kiba wan nabar, dei halor katei ka nongrim ba kum ki nongshna ashar kin kyntiew bad pynjanai ïaka rukom shna bad pynïaid ïew ïaki ashar lyngba katei ka project ai jinghikai.
Na ka liang u Bah Mayral Born Syiem haba kren ha katei ka sngi kum u kongsan u la pynpaw ka jingsngewkmen kaba khraw ban iohi ba ki longkmie na kylleng ki jaka ha Ri-Bhoi ki shim bynta ha katei ka prokram ban ioh jinghikai halor ka rukom shna ashar wat hadpeng ka jingbunkam haki ïing ki sem ban peit ïaki khun ki kti, namar katei kan ai jingmyntoi ïaki bad kyntiew ruh ïaka rukom pynmih ashar khamtam naka district Ri-Bhoi.
U la ong ruh ba ka long kaba donkam ban don ki kyrteng, ki dor ki mur, ki tarik shna bad kiwei kiwei namar kumba long mynta bun naki nongshna ashar ki thep beit haki bilor khlem jingthoh bad lehse lyngba katei ka prokram ai jinghikai kan nang kyntioew ïaka rukom pynmih ashar haka rukom kaba dei bad ba janai, ban long ruh kum ka lad kamai ïaki longkmie ba kin ïeng hala ki jong ki kjat.
Ha katei ka sngi naka liang ka tnad Horticulture kala sam ruh da ki syrnod sha baroh kitei ki longkmie kiba la pyndep ïaka jinghikai shna ashar ryngkat ki tiar ba kin pyndonkam haka por ba ki shna.